Sálbma 12
1 Koarrajođiheaddjái. “Gávccáda” mielde. Davida sálbma.
2 Gájo mu, Hearrá!
Dat geat ballet dus leat jávkan,
oskkáldas olbmot eai leat šat.
3 Juohkehaš gielista lagamuččas,
sárdnu litna baksamiiguin
ja guoktilaš mielain.
4 Vare Hearrá duššadivččii
buot litna baksamiid,
juohke njuokčama
mii sárdnu stuorra sániid!
5 Sii dadjet:
“Njuovčča addá midjiide vuoimmi,
baksamat leat min beali.
Gii dalle lea min hearrá?”
6 “Vártnuheamit sordojuvvojit
ja váivvášat šuhkket,
danne mun čuožžilan”,
cealká Hearrá.
“Mun beasttán su
gii badjelgehččojuvvo.”
7 Hearrá sánit leat buhtis sánit,
dego silba, eananstáččus
ráidnejuvvon,
čieža geardái čilgejuvvon.
8 Hearrá, don várjalat min,
don gáhttet min agálaš áigái
dán soga vuostá.
9 Ipmilmeahttumat leat juohke sajis,
ja billašupmi oažžu fámu.