Sálbma 123
1 Bassivádjoluslávlla.
Mun bajidan čalmmiidan du beallái,
guhte ásat almmis.
2 Nugo bálvaleaddji geahččá
hearrás gihtii,
nugo bálvaleaddjinisson geahččá
dálueamida gihtii,
nu mii geahččat Hearrái, Ipmilasamet,
dassážii go son árpmiha min.
3 Leage midjiide árbmugas, Hearrá,
leage midjiide árbmugas.
Mii leat guhká juo bilkiduvvon,
4 mii leat dolkan
čeavlás olbmuid fuonášeamis.