Sálbma 13
1 Koarrajođiheaddjái. Davida sálbma.
2 Man guhká, Hearrá?
Leatgo don vajáldahttán mu agálaš áigái?
Man guhká don čiegat mus muođuidat?
3 Man guhká mus leat
morašlaš jurdagat sielus
ja moraš váimmus beaivvis beaivái?
Man guhká mu vašálaš
lea vuoitimin?
4 Geahča mu beallái ja vástit munnje,
Hearrá, mu Ipmil!
Čuvge mu čalmmiid,
aman oađđát jápmimii,
5 vai mu vašálaš ii beasa dadjat:
“Mun vuiten”,
eaige mu vuostálastit beasa illudit
go mun suoibbun.
6 Muhto mun dorvvastan
du oskkáldasvuhtii,
mu váibmu illuda du bestojumis.
Mun dáhtun lávlut Hearrái,
son atná mus fuola.