Sálbma 138
1 Davida sálbma.
Mun giittán du oppa váimmustan,
mun lávllun dutnje máidnuma,
dutnje, in eará ipmiliidda.
2 Mun gopmirdan du bassi tempela guvlui
ja rámidan du nama, danin go don
leat árbmugas ja oskkáldas.
Don leat dahkan ollu eambbo
go maid leat lohpidan.
3 Dan beaivvi go mun du čurvon,
de don vástidit,
don devdet mu roahkkatvuođain
ja gievravuođain.
4 Buot eatnama gonagasat
rámidit du, Hearrá,
dasgo sii leat gullan du sániid.
5 Sii rámidit Hearrá geainnuid,
dasgo Hearrá hearvásvuohta lea stuoris.
6 Hearrá lea allat,
muhto son geahččá vuollegaččaide,
guhkkin juo son dovdá čeavlás olbmo.
7 Vaikko mun vádjolan áŧestusas áŧestussii,
de don várjalat mu eallima.
Don geiget gieđa,
du olgeš giehta gádju mu
vašálaččaid moaris.
8 Hearrá ollašuhttá dan
maid lea áigon mu várás.
Hearrá, du árbmu bistá agálaččat.
Ale guođe gaskan iežat barggu!