Sálbma 143
1 Davida sálbma.
Hearrá, gula go mun rohkadalan,
guldal mu njuoras átnuma!
Vástit munnje, donhan leat
oskkáldas ja vanhurskkis!
2 Ale doalvvo bálvaleaddját
dubmejuvvot,
dasgo ii oktage leat du ovddas vanhurskkis.
3 Vašálaš doarrádallá mu,
ja časká mu eatnamii.
Son bidjá mu ássat seavdnjadasas,
dego áigá juo jápmán olbmot.
4 Mu vuoigŋa vuoimmehuvvá,
mu váibmu stirdu balus.
5 Mun muittašan dološ beivviid,
smiehtadan buot du daguid,
suokkardan du gieđaid dujiid.
6 Mun geaigguhan gieđaid du beallái,
mu siellu áibbaša du
dego goikan eanan čázi. Sela
7 Vástit munnje, Hearrá!
Doama vástidit, mu vuoigŋa roahppána.
Ale čiega mus muođuidat,
aman šaddat daid láhkásažžan
geat leat mannan hávdái.
8 Divtte mu muosáhit
du oskkáldasvuođa iđidiid,
dasgo mun dorvvastan dutnje!
Čájet munnje geainnu man galggan vádjolit,
danin go mun bijan doaivvu dutnje.
9 Hearrá, beastte mu mu vašálaččain!
Mun ozan suoji du luhtte.
10 Oahpat mu ollašuhttit du dáhtu,
dasgo don leat mu Ipmil.
Vare du buorre Vuoigŋa láidešii mu
dássidis eatnama mielde.
11 Namat dihte, Hearrá, atte mu eallit!
Doalvvo mu olggos áŧestusas,
don guhte leat vuoigatlaš!
12 Duššat mu vašálaččaid,
don guhte leat oskkáldas!
Heavat buohkaid geat bivdet mu heakka,
dasgo mun lean du bálvaleaddji.