Sálbma 147
1 Halleluja!
Buorre lea lávlut rámádusa min Ipmilii,
máidnunlávlla lea čáppat ja heivvolaš.
2 Hearrá hukse Jerusalema,
son čohkke Israela biđgejuvvon álbmoga.
3 Son buorida daid
geain lea cuvkejuvvon váibmu,
son čatná sin háviid.
4 Son diehtá násttiid logu,
son lea addán buot daidda nama.
5 Min Hearrá lea stuoris ja fámolaš,
su viissisvuohta ii leat mihtideames.
6 Son doarju vártnuhemiid,
muhto ipmilmeahttumiid
son časká eatnamii.
7 Lávlot giittuslávlaga Hearrái,
čuojahehket lyrain giitosa min Ipmilii!
8 Son gokčá almmi balvvaiguin
ja addá arvvi eatnamii,
son bohciidahttá váriid rási.
9 Hearrá addá fuođđara omiide,
son biebmá gáranasčivggaid go dat čurvot.
10 Ii son illut heastta givrodaga dihte,
ii son beroš olbmá lášmes lávkkiin.
11 Hearrá ráhkista daid geat ballet sus,
daidda geat bidjet doaivvu su árbmui.
12 Rámit Hearrá, Jerusalem!
Máinno Ipmilat, Sion!
13 Son nanosmahttá du poarttaid smarttáid
ja buressivdnida du gávpoga mánáid.
14 Son addá lihku ja ráfi du eatnamii
ja galleha du buoremus nisuiguin.
15 Son vuolggaha gohččuma eatnama ala,
hoahpus olle su sátni.
16 Son diktá muohttaga gahččat
ulluid láhkái,
son biđge bizi dego gunaid.
17 Son suohppu čuorbmasiid dego moaluid,
su buolaš jiekŋuda čázi.
18 Son gohčču, ja jiekŋa suddá,
son diktá biekka bossut, ja čázit golggiidit.
19 Son lea almmuhan sánis Jakobii,
lágaidis ja gohččumiiddis Israelii.
20 Daid son ii almmuhan eará álbmogiidda,
su lágaid eai earát dovdda.
Halleluja!