Sálbma 15
1 Davida sálbma.
Hearrá, gii oažžu boahtit du goahtái,
gii beassá ássat du bassi váris?
2 Dat gii lea rehálaš
ja dahká dan mii lea riekta,
gean váibmu lea vuoigat
ja ságat duođat.
3 Dat gii ii sártno sealggebealde,
ii daga baháid lagamužžasis
iige heahppášuhte siidaguoimmis.
4 Dat gii badjelgeahččá
hilgojuvvon olbmo,
muhto gudnejahttá daid
geat ballet Hearrás.
Dat gii doallá váli vaikko iežas vahágin.
5 Dat gii ii gáibit loanas reanttu
iige leat duolgumis vigiheami vahágin.
Dat gii ná eallá, ii goassege suoibbo.