Sálbma 16
1 Davida miktam.
Várjal mu, Ipmil,
dasgo mun dorvvastan dutnje.
2 Mun dajan Hearrái:
“Don leat mu Hearrá,
mus ii leat mihkkege buriid earret du.”
3 Eatnama bassi olbmuide
son čájeha iežas ovddolaš ráhkisvuođa,
4 muhto ollu leat bákčasat dain
geat huovidit eará ipmiliid maŋŋái.
Mun in golggat varraoaffara daidda
inge váldde njálbmái daid namaid.
5 Hearrá, don leat mu árbeoassi
ja mu cearki,
don mearridat mu vuorbbi.
6 Mun lean ožžon iežan oasi
čáppa eatnamis, duođaid,
hearvás árbbi mun lean ožžon.
7 Mun máinnun Hearrá
guhte rávve mu,
velá ihkkuge mun gulan su rávvagiid
siskkildasastan.
8 Mun muittán Hearrá álelassii.
Go son lea mu olgeš bealde,
de mun in goassege suoibbo.
9 Danne mu váibmu illuda
ja mu siellu ávvuda,
velá mu rumašge lea oadjebas.
10 Don it hilggo mu sielu
jábmiidáibmui,
don it suova iežat oskkáldas
bálvaleaddji oaidnit hávddi.
11 Don válddahalat munnje
eallima geainnu,
du muođuid ovddas
lea ilu dievasvuohta,
agálaš ávvu du olgeš gieđa bealde.