Sálbma 18
1 Koarrajođiheaddjái. Davida, Hearrá bálvaleaddji, sálbma. Dán David lávllui Hearrái, go Hearrá lei gádjon su Saula ja buot vašálaččaid gieđas.
2 Hearrá, du mun ráhkistan,
don leat mu fápmu.
3 Hearrá, mu bákti ja mu ladni,
mu beasti, mu Ipmil, mu várri
gosa mun báhtaran, mu galba,
mu bestojumi čoarvi ja suodji.
4 Mun čurvon Hearrá
guhte lea máidnojuvvon,
son besttii mu mu vašálaččain.
5 Jápmima báttit čavge mu birra,
heavahusa rávnnjit
suorggahedje mu.
6 Jábmiidáimmu čatnasat
giessasedje mu birra,
mu ovddas ledje jápmima gielat.
7 Áŧestusastan mun čurvon Hearrá,
mun čurvon Ipmilasan.
Son gulai mu jiena tempelisttis,
mu čuorvvas bođii su beljiide.
8 Dalle eanan doarggistii
ja sparaidii,
váriid vuođđudusat lihkadedje,
su moarri doarggistahtii daid.
9 Suovva badjánii su njunis,
duššadeaddji dolla su njálmmis,
son rusui čuotnamiid ja hilaid.
10 Son sojahii almmi ja njiejai,
seavdnjatvuohta julggiid vuolde.
11 Son girddii keruba alde,
biekka soaját dolvo su hoahpus.
12 Son dagai
seavdnjadasa čiehkánis,
suhkkes arvebalvvaid
iežas govččasin.
13 Su báitima ovddas manne balvvat,
čuorbmasat ja áhcagas hilat.
14 Hearrá čearggui almmis,
Alimus divttii jienas gullot
čuorbmasiid ja áhcagas hilaid siste.
15 Son bážii njuolaidis
ja biđgii vašálaččaid,
son balddii sin álddagasaiguin.
16 Mearrabotni rokkit ihte,
eatnama vuođđudusat bohte oidnosii
go don áitet, Hearrá,
go du moari riđđu bosui dan badjel.
17 Son geigii allagasas gieđa
ja dohppii mu,
son gesii mu bajás čiekŋalis čáziin.
18 Son gájui mu
fámolaš vašálaččain,
vuostálastiin geat ledje munnje
menddo gievrrat.
19 Sii fallehedje mu
mu lihkuhisvuođa beaivvi,
muhto Hearrá bođii munnje doarjjan.
20 Son buvttii mu friddjavuhtii
ja besttii mu,
dasgo son ráhkista mu.
21 Hearrá mávssii munnje
mu vuoigatvuođa mielde,
son bálkkašii mu danne go
mu gieđat leat buhttásat.
22 Munhan ledjen vádjolan
Hearrá geainnuid
inge lean bahávuođas gáidan Ipmilis.
23 Buot su lágaid
mun lean atnán čalmmiid ovddas,
mun in leat hilgon su báhkkomiid.
24 Mun lean leamaš
láitemeahttun su ovddas,
mun lean váruhan suddudeames.
25 Hearrá mávssii munnje
mu vuoigatvuođa,
son oinnii ahte mu gieđat
leat buhttásat.
26 Don leat oskkáldas oskkáldassii
ja vuoigatlaš vuoigatlažžii.
27 Don leat buhtis buhttásii
muhto nággár dasa gii lea nággár.
28 Don beasttát vártnuhemiid,
muhto vuolidat daid geain leat
gorges čalmmit.
29 Hearrá, don divttát
mu lámppá čuovgat,
mu Ipmil čuvge mu seavdnjatvuođa.
30 Du vehkiin mun fallehan
soahteveaga,
Ipmilan vehkiin mun njuiken
muvrra badjel.
31 Ipmila geaidnu lea ollis,
Hearrá sátni lea buhtis.
Dego galba son suodjala daid
geat dorvvastit sutnje.
32 Gii lea Ipmil juos ii Hearrá,
gii lea bákti juos ii min Ipmil?
33 Ipmil vearjuda mu fámuin,
son dahká mu vádjolusa
láitemeahttumin.
34 Son dahká mu julggiid
fallin dego sarvvaálddu juolggit
ja addá munnje coavcci alážiin.
35 Son oahpaha mu gieđaid soahtat,
son máhttáha mo gealdit veaikedávggi.
36 Don attát munnje
bestojumát galbba,
don doarjjut mu olgeš gieđainat.
Don gulat mu rohkosa
ja dagat mu stuorisin.
37 Don rabat luotta mu lávkkiide,
mu láhpelađđasat eai vealčas.
38 Mun doarridan vašálaččaidan
ja jovssan sin,
mun in jorggit ovdal go lean
duššadan sin.
39 Mun cuvken sin,
nu ahte sii eai sáhte čuožžilit.
Sii gahččet mu julggiid vuollái.
40 Don vearjudat mu soahtái,
don bágget mu vuostálastiid
vuollánit.
41 Don áját mu vašálaččaid báhtui,
mun loahpahan daid
geat vašuhit mu.
42 Sii čurvot,
muhto ii oktage gájo sin,
sii čurvot Hearrái,
muhto son ii vástit sidjiide.
43 Mun cuvken sin gavjan biggii,
duolmman sin dego bálgáid stánžži.
44 Don gádjot mu
stuibmideaddji álbmogiin,
don bidjet mu
álbmogiid oaivámužžan.
Vieris álbmot ferte bálvalit mu,
45 sii jeagadit ovdal go
mun oppa gohčunge sin.
Amas olbmot dohkkestuvvet munnje.
46 Sii leat fámohuvvan,
doarggistemiin sii bohtet olggos
ladniineaset.
47 Hearrá eallá!
Rámiduvvon lehkos mu bákti!
Leage aliduvvon,
mu bestojumi Ipmil!
48 Ipmil diktá mu mávssahit,
son bidjá álbmogiid mu julggiid vuollái.
49 Don čoavddát mu vašálaččainan,
loktet mu mu vuostálastiid
bajábeallái,
don gájut mu veahkaválddálaččaid gieđas.
50 Danne mun rámidan du
álbmogiid gaskkas, Hearrá,
mun lávllun du nama máidnuma.
51 Son addá gonagassasis
stuorra vuoittuid,
son lea oskkáldas
dasa gean lea vuoidan,
Davidii ja su nállái, agálaččat.