Sálbma 19
1 Koarrajođiheaddjái. Davida sálbma.
2 Albmi gulaha Ipmila hearvásvuođa,
gomuvuohta muitala
maid su gieđat leat dahkan.
3 Beaivi doalvu das sága beaivái,
idja addá dieđus nuppi idjii.
4 Dat ii leat sárdnun, eai sánit,
dan jiena ii sáhte gullat.
5 Liikká dat sáhka viidána
miehtá eatnama,
duođaštus ollá máilmmi geahčái.
Dohko son lea ceggen beaivvážii goađi.
6 Beaivváš badjána dego irgi
headjagoađistis,
illuda dego valli viehkat
geainnus mielde.
7 Almmiravddas dat vuolgá
ja gávvá gitta nuppi ravdii,
ii mihkkege báze čihkosii
dan báitimis.
8 Hearrá láhka lea ollislaš,
dat arvvosmahttá sielu.
Hearrá oahppa lea luohtehahtti,
dat addá viisodaga ovttageardásažžii.
9 Hearrá gohččumat leat vuoigadat,
dat addet ilu váibmui.
Hearrá báhkkomat leat čielgasat,
dat addet čuovgga čalmmiide.
10 Hearrá sánit leat buhttásat,
dat bistet agálaččat.
Hearrá mearrádusat leat nannosat,
dat buot leat vuoigatlaččat.
11 Dat leat mávssoleappot go golli,
go buhtis golli eatnatvuohta,
njálgábut go honnet
mii goaiku gáhkuin.
12 Du bálvaleaddji doahttala
du báhkkomiid bagadusa.
Gii dan doallá
oažžu stuorra bálkká.
13 Gii fuomáša buot meaddádusaidis?
Atte munnje ándagassii suttuidan,
daidge maid ieš in dieđe.
14 Várjal bálvaleaddját
heahpatlaš suttuin,
vai dat eai ráđđeše mu.
Dalle lean láitemeahttun,
sivaheapme stuorra rihkkumiidda.
15 Váldde bures vuostá mu sániid,
suova mu váimmu jurdagiid
boahtit du muođuid ovdii,
Hearrá, mu bákti ja mu lonisteaddji!