Sálbma 2
1 Manne álbmogat stuibmidit,
manne čearddat hutket duššálaččaid?
2 Eatnama gonagasat čuožžilit,
ráđđejeaddjit ráđđádallet
gaskaneaset
Hearrá ja su vuidojuvvon
gonagasa vuostá:
3 “Botkejehkot sin láhkkiid
ja bálkestehkot sin čatnasiid!”
4 Son gii ráđđe almmis, boagusta,
Hearrá bilkida sin.
5 Son sárdnu sidjiide vašis,
son suorggaha sin buolli moaristis:
6 “Mun lean ásahan iežan gonagasa
Sionii, bassi várrásan.”
7 Mun almmuhan
maid Hearrá lea mearridan.
Son celkkii munnje:
“Don leat mu bárdni,
odne mun riegádahtten du.
8 Ánut mus, de mun attán dutnje
álbmogiid árbin
ja oppa eatnama opmodahkan.
9 Don cuvket álbmogiid
ruovdesoppiin
ja mollet daid dego láirálihtiid.”
10 Meannudehket viisásit,
gonagasat,
váldet vuostá rávvagiid,
eatnama ráđđejeaddjit!
11 Bálvalehket Hearrá baluin,
rámidehket su doarggistemiin!
12 Cummistehket bártni,
vai son ii moaráhuva
ja vai dii ehpet dušša,
dasgo su moarri cahkkana fargga.
Ávdugasat dat geat
dorvvastit sutnje.