Sálbma 26
1 Davida sálbma.
Hearrá, atte munnje vuoigatvuođa,
dasgo mun lean vádjolan
láitemeahttumit.
Mun dorvvastan Hearrái
inge suoibbo.
2 Suokkar mu, Hearrá,
ja geahččal mu,
guorahala mu váimmu
ja monimuččaid.
3 Du oskkáldasvuohta lea
mu čalmmiid ovddas,
mun vádjolan du duohtavuođas.
4 Mun in čohkká behtolaččaiguin
inge searvva guoktilaččaiguin.
5 Mun vašuhan
bahádahkkiid čoagganeami,
mun in čohkká searválaga
ipmilmeahttumiiguin.
6 Hearrá, mun basan gieđaid
vigihisvuođas.
Mun váccán du áltára birra.
7 Mun lávllun rámáduslávlaga
ja muitalan buot du oavdudaguid.
8 Hearrá, mun ráhkistan du viesu,
dan báikki gos du hearvásvuohta ássá.
9 Ale rohtte mu eret suttolaččaiguin,
ale divtte mu jápmit
oktanaga sorbmejeddjiiguin.
10 Sii leat gergosat dahkat rihkkosiid,
sin olgeš gieđas leat dievva
dulgojumit.
11 Muhto mun lean vádjolan
láitemeahttumit.
Lonis mu ja leage munnje árbmugas!
12 Mun čuoččun nana vuođu alde.
Čoakkalmasas mun máinnun Hearrá.