Sálbma 27
1 Davida sálbma.
Hearrá lea mu čuovga ja bestojupmi,
geas mun dalle galggašin ballat?
Hearrá lea mu heakka suodji,
geas mun dalle galggašin suorganit?
2 Go bahádahkkit lahkanit munnje
vai besset njielastit mu,
de sii ieža guossalit,
mu vašálaččat ja vuostálastit
gahččet eatnamii.
3 Vaikko soahteveahka
birastahtášii mu,
de mu váibmu ii balaše.
Vaikko sii fallehivčče mu,
de mun dattetge livččen dorvvolaš.
4 Ovtta mun ánuhan Hearrás,
ovtta áidna ášši mun bivddán:
Ahte oččošin orrut Hearrá viesus
buot eallinbeivviidan,
beasašin geahčadit
Hearrá hearvásvuođa
ja vuordit su vástádusa tempelis.
5 Son vurke mu goahtásis
bahás beaivvi,
son čiehká mu viesus suodjái,
gádju mu bávtti ala.
6 Dál mun bajidan oaivvi,
mun in bala vašálaččain
geat birastahttet mu.
Ávuin mun oaffarušan
giittusoaffara su bassibáikkis,
mun lávllun ja čuojahan Hearrái.
7 Hearrá, gula go mun čuorvvun,
leage munnje árbmugas
ja vástit munnje.
8 Mu váibmu muitá du sáni:
“Ohcet mu muođuid.”
Hearrá, mun ozan du muođuid.
9 Ale čiega mus muođuidat.
Ale gohčo suhtus
bálvaleaddját mannat;
don leat álo veahkehan mu.
Ale guođe mu alege hilggo mu,
mu bestojumi Ipmil!
10 Vaikko áhčči ja eadni
hilggošeigga mu,
de Hearrá atná mus fuola.
11 Hearrá, oahpat munnje
iežat geainnu,
láide mu dássidis bálgái,
luoitte mu vašálaččainan.
12 Ale divtte mu vašálaččaid
njiellat mu.
Sii leat vearreduođašteaddjit,
sii russot veahkaválddi.
13 Mun oskkun ahte beasan
oaidnit Hearrá buorrevuođa
ealli olbmuid eatnamis.
14 Vuordde Hearrá!
Leage dorvvolaš ja gievra.
Vuordde Hearrá!