Sálbma 30
1 Davida sálbma. Tempela vihahanávvudeami lávlla.
2 Mun máinnun du, Hearrá,
dasgo don gesset mu
bajás čiekŋalasas,
it diktán mu vašálaččaid illudit.
3 Hearrá, Ipmilan,
mun čurvon du,
ja don dearvvasmahttet mu.
4 Hearrá, jábmiidáimmus
don loktejit mu,
addet munnje eallima
ja gádjot mu hávddis.
5 Lávlot Hearrái, dii su oskkáldasat,
máidnot su bassi nama.
6 Čalbmeravkalanbotta bistá su moarri,
oppa eallináiggi bistá su árbmu.
Eahkedis čierrun boahtá guossái,
muhto iđedis ávvulávlla.
7 Go mun dovden iežan oadjebassan,
de mun jurddašin:
“Mun in suoibbo goassege.”
8 Hearrá, árpmustat
don ledjet veahkehan mu dorvui várrái,
muhto go don čihket muođuidat,
de mun suorganin.
9 Hearrá, dalle mun čurvon du,
dus, Hearrán, mun átnon njuorrasit:
10 Mii ávkkiid lea das
ahte mun jámán,
das ahte mun manan hávdái?
Sáhttábat muolda máidnut du,
gulahago dat du oskkáldasvuođa?
11 Hearrá, gula mu,
leage munnje árbmugas.
Hearrá, leage don mu veahkeheaddji!
12 Don jorgalit
mu morašteddjiid čierrumiid dánsumin,
nullet mus morašbiktasiid
ja gárvvuhit munnje ilu.
13 Danne mun lávllun dutnje
máidnuma,
mun in jávohuva goassege.
Hearrá, Ipmilan,
mun rámidan du agálaččat.