Sálbma 31
1 Koarrajođiheaddjái. Davida sálbma.
2 Hearrá, dutnje mun dorvvastan,
ale divtte mu goassege
šaddat heahpadii.
Don leat vanhurskkis, beastte mu.
3 Jorgal bealji mu beallái,
doama gádjut mu!
Leage mu bákti gosa sáhtán báhtarit,
ladni gos mun gávnnan bestojumi.
4 Don leat mu bákti ja ladni,
namat dihte don láidet
ja oahpistat mu.
5 Don gálggat mu fierpmis
maid vašálaččat bidje mu ovdii.
Don leat mu suodji.
6 Du gihtii mun attán vuoigŋan,
don lonistat mu, Hearrá,
don oskkáldas Ipmil.
7 Mun vašuhan daid geat bálvalit
vearri ja duššálaš ipmiliid.
Mun dorvvastan dutnje, Hearrá.
8 Mun ávvudan ja illudan
du árbmugasvuođas,
dasgo don leat oaidnán mu heađi
ja veahkehan mu mu áŧestusas.
9 Don it addán mu vašálačča gihtii,
muhto bidjet mu julggiid jalgadassii.
10 Hearrá, leage munnje árbmugas,
mun lean heađis.
Bahča moraš lea sotnadan
mu čalmmiid,
mu siellu ja rumaš lea váiban.
11 Mu eallin vássá morrašis,
mu jagit jávket šuohkkimiin.
Mu fápmu nohká heađi geažil,
mu dávttit sotnet.
12 Mun bilkiduvvon,
mun lean váivin
siidaguimmiidasan.
Mun lean šaddan balddonassan
oahppásiiddásan,
dat geat oidnet mu gáhtas,
báhtarit mus.
13 Mun lean vajálduhttojuvvon
dego livččen jápmán,
mun lean nugo cuovkanan lihtti.
14 Mun gulan olbmuid savkkuheamen.
Mu birra leat balddonasat,
sii lihtodit mu vuostá
ja vigget goddit mu.
15 Hearrá, mun dorvvastan dutnje,
mun cealkkán: Don leat mu Ipmil.
16 Mu eallinbeaivvit leat du gieđas,
gájo mu vašálaččain geat
doarrádallet mu.
17 Divtte du muođuid čuovgat
bálvaleaddjásat,
don leat árbmugas, beastte mu.
18 Hearrá, ale divtte mu šaddat heahpanit
go mun čuorvvun du.
Divtte ipmilmeahttumiid heahpanit
ja mannat jávohaga
jábmiidáibmui.
19 Vare jávohuvaše gielis baksamat
mat roavvásit sivahallet vigiheami
ja badjelgeahččamiin sárdnot
vanhurskása vuostá.
20 Man stuoris lea du buorrevuohta
maid leat vurken daid várás
geat ballet dus!
Olbmuid oaidnut don čájehat
buorrevuođa daidda geat
dorvvastit dutnje.
21 Don čiegat sin suodjásat,
válddát sin dorvui goahtásat.
Dohko eai olat olbmuid juonat
eaige sivahalli ságat.
22 Máidnojuvvon lehkos Hearrá!
Son čájehii munnje ovddolaš buorrevuođa
go mun ledjen heađis.
23 Mun jurddašin balus:
“Mun lean nordaduvvon eret
du čalmmiid ovddas.”
Muhto don gullet mu njuoras rohkosa
go mun čurvon dutnje.
24 Ráhkistehket Hearrá,
buot su bálvaleaddjit!
Hearrá várjala oskkáldas olbmuidis,
muhto mávssaha ollásit
daidda geat čevllohallet.
25 Lehket dorvvolaččat ja gievrrat,
dii buohkat geat vuordibehtet Hearrá!