Sálbma 33
1 Bajidehket ávvučuorvasa Hearrái,
dii vanhurskásat,
vuoigatlaččat, lávlot Hearrá máidnuma!
2 Rámidehket su lyrain,
čuojahehket sutnje logisuonat hárppain.
3 Lávlot Hearrái ođđa lávlaga,
čuojahehket čábbát ja čurvot ilus.
4 Hearrá sátni lea duohta,
son lea oskkáldas buot das maid dahká.
5 Son ráhkista vuoigatvuođa
ja vanhurskkisvuođa,
su oskkáldasvuohta deavdá eatnama.
6 Hearrá lea sániinis
sivdnidan almmi,
daid veaga iežas njálmmi
vuoiŋŋanasain.
7 Dego lihttái son čohkkii
meara čáziid,
bijai čiekŋalasaid rávnnjiid
vuorkkáidasas.
8 Ballos Hearrás oppa máilbmi,
doarggistehkoset su ovddas
buot eatnama ássit.
9 Son sártnui, ja dat šattai,
son gohčui, ja dat dáhpáhuvai.
10 Hearrá moive álbmogiid
áigumušaid,
dahká duššin olbmuid čearddaid
jurdagiid.
11 Hearrá áigumuš bissu agálaččat,
su váimmu jurdagat buolvvas bulvii.
12 Ávdugas dat álbmot
man Ipmil Hearrá lea,
dat álbmot maid son lea válljen
opmodahkanis.
13 Almmis Hearrá geahččá eatnamii
ja oaidná juohke olbmo.
14 Truvnnustis son geahččá
buohkaide geat ásset
eatnama alde,
15 geaid váimmu son lea dahkan.
Sin daguid son dovdá visot.
16 Ii gonagas vuoitte
stuorra veagainis,
eai jálu gájo su iežas searat.
17 Ii oktage sáhte luohttit
heastta gádjut su,
ii dat beastte ovttage
gievravuođainis.
18 Muhto Hearrá goziha daid
geat ballet sus,
daid geat luhttet su oskkáldasvuhtii.
19 Son čoavdá sin jápmimis
ja gádju sin nealggis.
20 Mii vuordit Hearrá áibbašemiin,
son lea min veahkki ja min galba.
21 Son lea min váimmu illu,
mii dorvvastit su bassi nammii.
22 Hearrá, árpmit min,
dasgo mii vuordit du.