Sálbma 37
1 Davida sálbma.
Ale moaráhuva baháide,
ale gáđaš vearredahkkiid.
2 Sii goldnet fáhkka dego rássi,
goiket nugo ruonas šattut.
3 Dorvvas Hearrái ja daga buori,
de beasat eallit eatnamis
oadjebassan.
4 Illut Hearrás, de son addá dutnje
maid du váibmu hálida.
5 Bija iežat geainnu Hearrá háldui,
dorvvas sutnje,
son atná dus fuola.
6 Son diktá du vanhurskkisvuođa
badjánit dego iđitguovssu,
du vuoigatvuođa čuovgat
nugo čuvges beaivi.
7 Leage jaskat Hearrá ovddas,
vuordde su veahki!
Ale moaráhuva dasa
geas lea lihkku geainnuinis,
dasa gii atná bahás juonaid.
8 Heaitte moari, divtte suhtu jávkat.
Ale divtte moarát cahkiidit,
dat buktá aivve bahá.
9 Dat geat dahket bahá,
duššaduvvojit,
muhto dat geat vurdet Hearrá,
árbejit eatnama.
10 Oanehis bottoža geažes
ipmilmeahttun lea jávkan,
go don geahčat su báikki,
de son ii leat das.
11 Muhto vuollegaččat árbejit eatnama,
sii ožžot lihku ja ráfi.
12 Ipmilmeahttun hutká baháid
vanhurskása vuostá
ja gižaha sutnje bániid.
13 Muhto Hearrá boagusta su,
son oaidná ahte su beaivi boahtá.
14 Ipmilmeahttumat rohttejit miehki
ja geldet dávggi
vai besset njeaidit váivváša ja geafi,
vai besset goddit vuoigatlaš olbmuid.
15 Muhto miehkki deaivá
sin iežaset váibmui,
ja sin dávggit doddjojit.
16 Buoret dat unnánaš
mii vanhurskásis lea
go ipmilmeahttumiid
stuorra riggodat.
17 Ipmilmeahttumiid
fápmu cuvkejuvvo,
muhto Hearrá doarju vanhurskásiid.
18 Hearrá dovdá
láitemeahttumiid beivviid,
sin árbi bistá agálaš áigái.
19 Eai sii šatta heahpanit bahás áiggiid,
nealggi áigge sii gallehuvvojit.
20 Muhto ipmilmeahttumat duššet
dego gietti hearvarásit,
Hearrá vašálaččat jávket dego suovva.
21 Ipmilmeahttun váldá loanas
iige mávsse,
vanhurskkis lea láđis ja árvvas.
22 Dat geaid Hearrá buressivdnida,
árbejit eatnama,
muhto geaid son garuha,
áddjojuvvojit eret.
23 Hearrá nanne olbmá lávkkiid,
go son vádjola vuoigadis geainnu.
24 Jos son guossala,
de son ii jorral,
dasgo Hearrá doallá su gieđas.
25 Lean leamaš nuorra
ja lean šaddan boarisin,
muhto in goassege leat oaidnán
vanhurskása hilgojuvvon
inge su mánáid gearjideamen láibbi.
26 Álo son lea váibmoláđis
ja luoiká árvasit,
ja su mánát buressivdniduvvojit.
27 Gáidda bahás ja daga buori,
de don beasat álo ássat
iežat eatnamis.
28 Hearrá ráhkista vuoigatvuođa,
ii son hilggo oskkáldas olbmuidis.
Sii várjaluvvojit agálaš áigái,
muhto ipmilmeahttumiid sohka
duššá.
29 Vanhurskásat árbejit eatnama,
sii besset ássat das agálaččat.
30 Vanhurskása njálbmi sárdnu
viissisvuođa,
su njuovčča muitala mii lea riekta.
31 Sus lea váimmus Ipmila láhka,
eaige su lávkkit suoibbo.
32 Ipmilmeahttun olmmoš vuođgŋá
vanhurskása
ja bivdá su heakka.
33 Hearrá ii atte su
ipmilmeahttuma gihtii
iige suova su dubmejuvvot
sivalažžan.
34 Vuordde Hearrás veahki,
vádjol su geainnu!
Son alida du,
don árbet eatnama
ja beasat oaidnit
go ipmilmeahttumat duššet.
35 Mun oidnen
ipmilmeahttun ja veahkaválddálaš
olbmá faŋkámin
dego Libanona sedermuorra.
36 Go mun de mannen
dakko meattá, de son lei jávkan;
mun ohcen su,
muhto in gávdnan.
37 Geahčat láitemeahttuma,
dárko vuoigatlačča –
ráfi olbmos lea boahtteáigi!
38 Muhto buot suttolaččat duššet,
ipmilmeahttumiid boahtteáigi
botkejuvvo.
39 Vanhurskásiid bestojupmi
boahtá Hearrás,
son lea sin nana suodji
áŧestusa áigge.
40 Hearrá veahkeha ja gádju sin,
son čoavdá sin
ipmilmeahttumiid gieđas
ja beastá sin,
go sii dorvvastit sutnje.