Sálbma 39
1 Koarrajođiheaddjái. “Jedutuna” mielde. Davida sálbma.
2 Mun jurddašin:
Mun gáhtten iežan vádjolusa,
aman suddudit njuokčamiin.
Mun lohkkadan njálmmi
ja orun jávohaga
nu guhká go ipmilmeahttumat
leat gullanmuttus.
3 Nu mun jávohuvven ja jaskkodin,
mun orron jávohaga,
muhto duššás.
Mu bávččas vearránii,
4 mus váibmu báhkkanii,
mun šuhkken, mu váibmu
bulii dego dolla.
Dalle mun sárdnugohten:
5 Hearrá, oahpat mu muitit
iežan loahpa,
ahte mu beivviid lohku lea unni,
vai mun áddešin man nohkavaš
mun lean.
6 Dušše čorpma dievva
beivviid don addet munnje,
mu eallináigi lea du čalmmiin
dego dušši.
Olmmoš lea dego jiella, Sela
7 son jávká nugo suoivvan.
Dušše jiella leat dávvirat
maid son čobme,
ii son dieđe gii daid oččoš.
8 Hearrá, maid mun vel vuorddán?
Aivve dutnje mun bijan iežan doaivvu.
9 Čoavdde mu buot mu rihkkumiin,
ale suova jallaid bilkidit mu.
10 Mun jávohuvan inge rabas njálmmi,
don diktet nu šaddat.
11 Váldde eret dan givssi
maid leat bidjan mu guoddit,
mun duššan go don časkkát mu.
12 Go don bagadat ja ráŋggáštat
olbmo su suttu dihte,
dalle don loavttát dego muohcu
buot maid son ráhkista.
Olmmoš lea dušše jiella. Sela
13 Gula mu rohkosa, Hearrá,
guldal mu čuorvasa.
Ale oro jávohaga go mun čierun.
Dasgo mun lean vieris du luhtte,
guossi nugo buot mu áhčitge.
14 Jorgal mus eret iežat geahčastaga,
vai beasan illudit
ovdal go vuolggán eret
inge leat šat.