4Til korleiaren. Med strengespel. Ein salme av David.

    2 Svar meg når eg ropar,
          du min rettferds Gud!
          Du viser meg ein veg ut av nauda.
          Ver meg nådig og høyr mi bøn!

    3 De menneske, kor lenge
          skal mi ære krenkjast?
          Kor lenge skal de elska det som er tomt
          og jaga etter løgn?

    4 Vit at Herren gjer under
          for den som er trufast mot han.
           Herren høyrer når eg ropar til han.

    5 Skjelv for han og synd ikkje meir.
          Sei til dykk sjølve når de går til ro: «Ver stille!»

    6 Ber fram rette offer
          og set dykkar lit til Herren!

    7 Mange seier:
          Kven kan gje oss lukke?
          Lat lyset frå ditt andlet
          skina over oss, Herre!

    8 Du gjev meg større glede i hjartet
          enn andre får av mengder med korn og vin.

    9 I fred vil eg leggja meg ned og sova.
          For du, Herre, berre du
          lèt meg kvila trygt.

< Forrige kapittel

Neste kapittel >

27. mars 2023