Sálbma 41
1 Koarrajođiheaddjái. Davida sálbma.
2 Lihkolaš dat gii atná fuola
heajos olbmos.
Su Hearrá gádju bahás beaivvi.
3 Hearrá várjala su
ja bisuha su heakkas.
Olbmot máidnot su lihkolažžan.
Hearrá ii atte su
su vašálaččaid sorbmenhálu háldui.
4 Hearrá doarjala su
go son veallá buohccin,
son lokte su buohcanseaŋggas.
5 Mun cealkkán: Hearrá, árpmit mu,
daga mu dearvvašin!
Mun lean suddudan du vuostá.
6 Mu vašálaččat sávvet
munnje bahá:
“Vare son juo fargga jámášii
ja su namma vajálduvašii!”
7 Jos muhtun boahtá mu geahččat,
de son sárdnu guoros sániid,
bidjá muitui buot bahá,
vuolgá eret ja muitala dan.
8 Buot mu vašálaččat
hutket baháid mu vuostá
ja savkkuhit gaskaneaset.
Sii dadjet:
9 “Sutnje lea njommon juoga bahá.
Die son veallá, iige šat čuožžil!”
10 Velá mu ustitge
geasa mun luhtten
ja gii borai mu beavddis,
jorgala čeavlájit mu vuostá.
11 Muhto Hearrá, árpmit don mu,
lokte mu čuoččat, vai mun beasan
mávssahit sidjiide.
12 Go vašálaš ii vuoitte mu,
das mun dieđán ahte don ráhkistat mu.
13 Don doarjjut mu,
dasgo mun lean láitemeahttun,
don suovat mu álo leat iežat lahka.
14 Máidnojuvvon lehkos Hearrá,
Israela Ipmil,
agálašvuođas agálašvuhtii!
Amen, amen.