NUBBI GIRJI
Sálbma 42
421 Koarrajođiheaddjái. Oahpahansálbma. Korahlaččaid sálbma.
2 Nugo sarvva áibbaša
golgi jogaža čáziide,
nu mu siellu áibbaša du, Ipmil.
3 Mu siellu goikaluvvá Ipmilii,
ealli Ipmilii.
Goas beasan boahtit tempelii,
goas loaiddastit
Ipmila muođuid ovdii?
4 Gatnjalat leat mu borramuš
ija beaivvi.
Olbmot jearahit mus álo:
“Gos lea du Ipmil?”
5 Mun dohppehalan morrašii
go muittašan
mo mun Veagalačča suodjalusas johten
Ipmila vissui illudemiin ja giitimiin
stuorra joavkku fárus
mii lei vádjoleamen doallat basiid.
6 Manne moraštat, mu siellu,
manne leat nu mášoheapme?
Vuordde Ipmila!
Velá oktii mun beasan giitit su,
Ipmila, iežan beasti.
7 Mu siellu morašta,
dan dihte mun jurddašan du
Jordana ja Hermona eatnamis,
Misarváris.
8 Čiekŋalas čuorvu čiekŋalassii
go du goržžit šávvet,
buot du siiggát ja bárut
márret mu badjel.
9 Beaivet Hearrá čájeha
iežas árbmugasvuođa,
ihkku mun lávllun su máidnuma
ja rohkadalan mu eallima Ipmila.
10 Mun cealkkán Ipmilii, mu báktái:
“Manne don leat vajáldahttán mu?
Manne mun ferten johtit morrašis
go vašálaš áŧesta mu?”
11 Mus manná čađa sivu
go mu vašálaččat hiddjidit mu,
go sii álo jearahit mus:
“Gos lea du Ipmil?”
12 Manne moraštat, mu siellu,
manne leat nu mášoheapme?
Vuordde Ipmila!
Velá oktii mun beasan giitit su,
Ipmila, iežan beasti.