Sálbma 43
1 Atte munnje vuoigatvuođa,
Ipmil, jođit mu ášši
oskkáldasmeahttun álbmoga vuostá.
Gájo mu behtolaš ja bahás olbmuin!
2 Don, Ipmil, leat mu suodji.
Manne leat hilgon mu?
Manne mun šattan moraštit,
go vašálaš áŧesta mu?
3 Vuolggat iežat čuovgasa ja duohtavuođa,
divtte daid láidet mu du bassi várrái,
ássanbáikásat,
4 nu ahte mun oaččun boahtit
du áltára ovdii,
du muođuid ovdii, Ipmil, mu illu ja ávvu,
ja rámidit du lyrain,
Ipmil, mu Ipmil!
5 Manne don moraštat, mu siellu,
manne leat nu mášoheapme?
Vuordde Ipmila!
Velá oktii mun beasan giitit su,
Ipmilan, mu beasti.