Sálbma 45
1 Koarrajođiheaddjái. Lávlojuvvo dego “Lilját”. Korahlaččaid oahpahansálbma, ráhkisvuođalávlla.
2 Mu váimmus leat dievva
čáppa sánit.
Mun lávllun lávlaga gonagasa gudnin,
mu njuovčča lea dego
čeahpes čálli peanna.
3 Don leat čábbámus
buot olbmuin,
du baksamat sárdnot litna sániid.
Danne Ipmil lea buressivdnidan du
agálaš áigái.
4 Čana miehki alimiid birra,
veagalaš,
gárvot allatvuođa ja hearvásvuođa!
5 Vuolgge vuoitit, soađa
duohtavuođa ja vuoigatvuođa
ovddas!
Dahkos du olgeš giehta
hirbmatlaš daguid.
6 Olbmot gahččet du ovdii,
bastilis njuolat deivet
gonagasa vašálaččaid váibmui.
7 Du truvdnu, Ipmil, bissu agálaččat,
du gonagassoabbi
lea vuoigatvuođa soabbi.
8 Don ráhkistat vuoigatvuođa
ja vašuhat vearrivuođa.
Dan dihte Ipmil, du Ipmil,
lea vuoidan du ilu oljjuin
eambbo go du láhkásaččaid.
9 Myrra, aloe ja kassia hádja
lea buot du biktasiin.
Streaŋggaid šuoŋat
lanjain mat leat čiŋahuvvon
elefántabátnehearvvaiguin,
illudahttet du.
10 Válljejuvvon nissoniiddát
searvvis
leat gonagasa nieiddat,
du olgeš bealde lea dronnet,
Ofira golliiguin čiŋadan.
11 Gula, nieiddažan,
guldal ja oahpa!
Vajáldahte iežat álbmoga
ja áhčát soga.
12 Gonagas liiko du čábbodahkii,
son lea du hearrá,
gopmir su ovdii.
13 Tyrosa nieida,
álbmoga riggát dohkkestuvvet
dutnje attáldagaideasetguin.
14 Gonagasa nieida
boahtá sisa čábbát čiŋadan,
su bivttas lea čađa gođđojuvvon
golliin.
15 Čikŋabiktasat gárvun
son mieđuštuvvo gonagasa ovdii.
Nuorra nieiddat, su ustibat,
bohtet su maŋis.
16 Sii láidejuvvojit ovdan
illudemiin ja ávvudemiin,
sii mannet gonagasa šlohttii.
17 Du bártnit bohtet áhčiidat sadjái,
don bijat sin oaivámužžan
miehtá máilmmi.
18 Mun divttán du nama beaggit
boahtti buolvvaide,
danin álbmogat rámidit du
álo ja agálaččat.