Sálbma 48
1 Lávlla. Korahlaččaid sálbma.
2 Stuoris lea Hearrá,
sakka rámiduvvon
iežas gávpogis, bassi váristis.
3 Dat badjána čáppisin,
oppa máilmmi ávvun,
Sionvárri, Ipmila várri,
stuorra gonagasa gávpot.
4 Ipmil ássá gávpoga ladniin,
son lea dan nana suodji.
5 Gonagasat čoagganedje,
sii fallehedje oktan veahkan.
6 Sii geahčastedje ja suorganedje,
sii hirpmástuvve ja báhtaredje.
7 Sii dohppehalle ballui
nugo riegádahtti nisson
dohppehallá ávttaide,
8 sii ledje dego Taršiš-skiippat
go nuortariđđu cuvke daid.
9 Maid mii leimmet gullan,
dan mii leat oaidnán
Hearrá, Almmiveagaid Ipmila,
gávpogis:
Ipmil diktá dan bissut agálaččat. Sela
10 Ipmil, mii guorahallat
du árbmugas daguid
du bassi tempelis.
11 Ipmil, du namma máidnojuvvo,
dat rámiduvvo
gitta eatnama ravddaid rádjái.
Du olgeš gieđa dievva lea
vuoigatlašvuohta.
12 Sionvárri ávvuda,
Juda gávpogat illudit
du duomuid dihte.
13 Vulget, mannet Siona birra,
lohket dan toartnaid,
14 gehččet dan muvrraid,
mannet dan ladniid čađa.
Muitalehket boahtti buolvvaide:
15 Dákkár lea Ipmil,
min Ipmil agálaš áigái.
Son láide min álo.