Sálbma 52
1 Koarrajođiheaddjái. Davida oahpahansálbma, 2 dalle go edomlaš Doeg lei muitalan Saulii ahte David lei mannan Ahimeleka lusa.
3 Manne don goarggastalat
bahávuođainat,
fámolaš olmmái?
Ipmila oskkáldasvuohta bistá
geažos beaivvi.
4 Don smiehtat heavaheami,
du njuovčča lea bahájuonalaš
dego saddjojuvvon niibi.
5 Don ráhkistat bahá buori sajis,
giellásiid ovdal
go duohtavuođa. Sela
6 Don ráhkistat bilideaddji
sárdnuma,
behtolaš njuovčča.
7 Dan dihte Ipmil njeaidá du
agálaš áigái,
dohppe du ja rohtte du
olggos goađistat,
son gaikkiha du luovos
ealli olbmuid eatnamis. Sela
8 Vuoigatlaččat oidnet dan ja ballet,
ja sii boagustit ja dadjet:
9 “Die lea olmmái
gii ii atnán Ipmila suodjinis,
muhto dorvvastii
iežas stuorra riggodahkii,
son anii bahávuođa
gievravuohtanis.”
10 Muhto mun lean dego suhkkes
oliivamuorra Ipmila viesus.
Mun dorvvastan
Ipmila oskkáldasvuhtii álo
ja agálaččat.
11 Mun giittán du agálaččat
das maid leat dahkan.
Mun bijan doaivvu du nammii
ovttas daiguin geat ballet dus,
dasgo dat lea buorre.