Sálbma 59
1 Koarrajođiheaddjái. Lávlojuvvo dego “Ale bilit”. Davida miktam, dalle go Saul lei vuolggahan olbmuid fáktet su viesu ja áiggui goddit su.
2 Beastte mu, Ipmil,
vašálaččaidan gieđas,
várjal mu dain geat fallehit mu.
3 Beastte mu olbmuin
geat dahket veriid,
gájo mu sorbmejeddjiid gieđas.
4 Sii vuđgŋet mu heakka,
gievrras olbmát ráhkkanit
soahtat muinna,
vaikko mun in leat suddudan
inge dahkan veriid, Hearrá.
5 Vaikko mun in leat sivalaš,
de sii ráhkkanit fallehit.
Gohccá, boađe mu lusa ja geahča!
6 Hearrá, Almmiveagaid Ipmil,
don leat Israela Ipmil.
Gohccá ja ráŋggáš buot álbmogiid,
ale árpmit
oskkáldasmeahttun behttiid! Sela
7 Sii máhccet juohke eahkeda,
holvot dego beatnagat
ja vihket miehtá gávpoga.
8 Sánit golget sin njálmmis,
sin baksamat leat miehkit.
Sii gáddet ahte ii oktage gula.
9 Muhto don, Hearrá,
boagustat sin,
don bilkidat buot álbmogiid.
10 Mu givrodat, mun vuorddán
du, Ipmil,
don leat mu nana ladni.
11 Mu Ipmil boahtá mu ovddal
árbmugasvuođainis,
son diktá mu oaidnit
go mu vašálaččat gahččet.
12 Ale gotte sin,
amas mu álbmot vajáldahttit dan.
Daga sin ruovttuheapmin
fámuinat,
nordat sin vuolás, Hearrá,
min galba.
13 Juohke sátni maid
sii dadjet, lea suddu.
Divtte sin sorrot iežaset
čeavláivuhtii
daid garrudusaid ja giellásiid dihte
maid sii sárdnot.
14 Duššat sin moaristat,
duššat sin vai sii eai šat leat.
Dalle álbmogat gitta eatnama
ravddaid rádjái áddejit,
ahte Ipmil ráđđe Jakobis.
Sela
15 Sii máhccet juohke eahkeda,
sii holvot dego beatnagat
ja vihket miehtá gávpoga.
16 Sii vádjolit ohcamin borramuša
ja harret go eai gallán.
17 Muhto mun máinnun du fámu
ja illudan juohke iđida
du oskkáldasvuođa dihte.
Dasgo don leat mu ladni,
mu báhtaransadji heahtebeaivvi.
18 Ipmil, mu givrodat,
mun lávllun dutnje.
Don leat mu nana ladni,
mu oskkáldas Ipmil.