Sálbma 60
1 Koarrajođiheaddjái. Lávlojuvvo dego “Duođaštusa liljá”. Oahpahuvvot. Davida miktam, 2 dalle go son soađai Naharajima ja Soba aramealaččaiguin, ja Joab lei máhccan ja časkán edomlaččaid Sálteleagis, guoktenuppelohkáiduhát olbmá.
3 Ipmil, don hilgot min
ja cuvkejit min,
don ledjet moaris.
Čuoččáldahte min fasttain.
4 Don doarggistahttet eatnama
ja diktet dan ráhkat.
Divo dan ráhkamiid,
dasgo dat lea duššamin.
5 Don diktet iežat álbmoga muosáhit
garra áiggi,
jugahit midjiide viinni
nu ahte mii suoibbuimet.
6 Muhto daidda geat ballet dus,
don leat ceggen leavgga,
dan lusa sii sáhttet báhtarit
dávggis. Sela
7 Beastte min olgeš gieđainat
ja vástit midjiide,
vai dat geaid don ráhkistat,
gáddjojuvvošedje.
8 Ipmil lea sárdnon bassibáikkistis:
Ávuin mun juogadan Sikema
ja mihtidan Sukkotleagi.
9 Munnje gullá Gilead ja Manasse,
Efraim lea mu oaivesuodji,
Juda lea mu ráđđensoabbi.
10 Moab lea mu basadanlihtti,
Edomii mun bálkestan
gápmagiiddán.
Filistea vuostá mun bajidan
soahtečuorvasa.
11 Gii doalvu mu nana gávpogii,
gii láide mu Edomii?
12 Itgo don Ipmil, hilgon min,
itge vuolgán min soahteveagaiguin?
13 Veahket min vašálačča vuostá.
Dasgo olbmuid veahkis ii leat ávki.
14 Ipmila fámuin mii dahkat
stuorra daguid,
son duolbmá min vašálaččaid.