Sálbma 62
1 Koarrajođiheaddjái. Jedutuna mielde. Davida sálbma.
2 Aivvefal Ipmila ovddas
mu siellu gávdná ráfi,
sus boahtá mu bestojupmi.
3 Aivvefal son lea mu bákti
ja mu bestojupmi, son lea mu ladni,
in mun suoibbo.
4 Man guhká dii áigubehtet
fallehit ovtta olbmá ja goddit su,
norddastit su vuolás dego
állanaddi seainni
dahje gahčči muvrra?
5 Sii ráđđádallet gaskaneaset
vai besset norddastit mu vuolás.
Sii ráhkistit beahttima,
njálmmiin sii gal buressivdnidit,
muhto váimmus sii garuhit.
Sela
6 Aivvefal Ipmila ovddas
mu siellu gávdná ráfi,
son addá munnje doaivvu.
7 Aivvefal son lea mu bákti
ja mu bestojupmi,
son lea mu ladni, in mun suoibbo.
8 Ipmilis boahtá mu bestojupmi
ja gudni.
Son lea mu nana bákti,
son lea mu dorvu.
9 Olbmot, dorvvastehket álelassii Ipmilii,
buktet su ovdii buot
mii deaddá váimmu.
Ipmil lea min dorvu. Sela
10 Olmmoš lea dušše vuoiŋŋanas,
olbmománát eai leat mahkkege.
Veavttas sii eai olu deatte,
sii leat geahppaseappot go áibmu.
11 Allet dorvvas veahkaváldái,
allet duššiid dihte bija doaivvu
rieviduvvon opmodahkii.
Vaikko opmodat lassána,
de allet dorvvas dasa.
12 Ovtta geardde Ipmil lea sárdnon,
guovtte geardde
lean dan gullan:
Fápmu gullá Ipmilii,
13 don, Hearrá, leat oskkáldas.
Don mávssát juohkehažžii
su daguid mielde.