Sálbma 64
1 Koarrajođiheaddjái. Davida sálbma.
2 Ipmil, gula mu jiena
go mun váidalan,
várjal mu heakka
go vašálaš suorggaha.
3 Čiega mu baháid juonain,
vearredahkkiid šlámaideaddji
joavkkus.
4 Sii sadjet njuokčameaset bastilin
dego miehkki,
báhčigohtet bahča sániideasetguin
nugo njuolaiguin.
5 Fáhkka sii báhčet čihkosis vigiheami,
báhčet eaige bala.
6 Sii giktalit guhtet guimmiideaset
dahkat bahá,
sii muitalit mo áigot bidjat čiegus gielaid
ja dadjet: “Ii dan oainne oktage.”
7 Sii hutket baháid ja dadjet:
“Mii leat gárvásat,
jurdda lea hutkojuvvon.”
Čieŋal lea olbmo váibmu.
8 Muhto Ipmil báhčá njuolaidis
sin njeaiga,
fáhkkestaga sii deaivvahallet.
9 Sin iežaset njuovčča
jorralahttá sin.
Buohkat geat oidnet sin,
hirpmástuvvet.
10 Buot olbmot suorganit,
sii gulahit maid Ipmil lea dahkan
ja guorahallet Ipmila daguid.
11 Vanhurskkis illuda Hearrás
ja ohcá dorvvu su luhtte.
Buot vuoiggalaččat
máidnot iežaset lihkolažžan.