Sálbma 65
1 Koarrajođiheaddjái. Davida sálbma, lávlla.
2 Ipmil, mii lávlut dutnje
máidnuma Sionis,
mii doallat lohpádusaid
maid attiimet dutnje,
3 dasgo don gulat rohkadusaid.
Buot olbmot bohtet du lusa
4 dovddastit suttuideaset.
Go min suttut šaddet midjiide
menddo lossadin,
de don attát daid ándagassii.
5 Ávdugas dat gean don válljet!
Don divttát su boahtit lusat
ja ássat iežat ovdašiljuin.
Du viesu buorrevuohta
ja du tempela bassivuohta
galleha min.
6 Don, min bestojumi Ipmil,
vástidat min rohkadusaide
vanhurskkisvuođa ovddolaš daguiguin.
Don leat buot eatnama ravddaid ja
gáiddus mearaid dorvu.
7 Don ceggejit váriid givrodagainat,
don ledjet gárvodan
veagalašvuođa.
8 Don jaskkodahttet
máraideaddji meara,
báruid mára ja álbmogiid šláma.
9 Dat geat ásset eatnama ravddain,
suorganit du mearkkain.
Don deavddát ávuin nuortti ja oarjji.
10 Don geahčat eatnama beallái
ja attát dasa arvvi,
don dagat dan šattolažžan.
Ipmila joga dievva lea čáhci.
Don oaččut gortniid šaddat,
don anát fuola eatnamis.
11 Don láktadat bealddu jorgunluottaid
ja dásset jorgojuvvon eatnama,
don dipmadat eatnama
arveovttiiguin
ja buressivdnidat dan šattuid.
12 Don kruvnnidat jagi
buriid attáldagaiguin,
šattolašvuohta vuohču du luottain.
13 Meahccegiettit runiidit,
dievát gárvodit ávu.
14 Sávzaealut čiŋahit gittiid
ja gordni gokčá legiid.
Olbmot ávvudit ja lávlot.