Sálbma 66
1 Koarrajođiheaddjái. Lávlla, sálbma.
Bajit máidnunčuorvasa Ipmilii,
oppa eanan,
2 lávllo sutnje rámádusa,
gudnejahte su máidnumiin!
3 Dadjet Ipmilii:
Hirbmatlaččat leat du dagut!
Du vašálaččat dohkkestuvvet dutnje
du veagalaš fámu dihte.
4 Oppa eanan gopmirda ja máidnu du,
lávlu rámádusa du nammii. Sela
5 Bohtet geahččat maid Ipmil lea dahkan!
Son lea dahkan olbmuide
hirbmatlaš daguid.
6 Son nuppástuhtii meara
goikeeanamin,
goikejulggiid sii rasttildedje eanu.
Dan dihte mii oažžut illudit su siste.
7 Stuorra válddiin
son ráđđe agálaččat,
su čalmmit gozihit álbmogiid.
Vuostehágolaččat
eai oaččo čuožžilit. Sela
8 Máidnot min Ipmila, buot álbmogat,
diktet ávvulávlaga čuodjat!
9 Son bisuha min heakkas
son ii divtte min julggiid suoibut.
10 Don, Ipmil, leat geahččalan min,
don leat buhtistan min
nugo olmmoš čilge silbba.
11 Don diktet min darvánit fierbmái,
don bidjet min guoddit noađi.
12 Don luitet olbmuid riidet
min oaivvi badjel,
mii šattaimet mannat dola
ja čázi čađa,
muhto don buktet min valljivuhtii.
13 Mun buvttán boaldinoaffara
du tempelii,
mun ollašuhtán dutnje lohpádusaidan
14 maid mu baksamat celke,
maid mu njálbmi sártnui
go mun ledjen heađis.
15 Mun buvttán dutnje buoiduduvvon
omiid boaldinoaffarin
ja divttán vierccaid boaldinsuova badjánit,
mun oaffarušan vuovssáid
ja bohkáid. Sela
16 Bohtet gullat, buohkat geat
ballabehtet Ipmilis,
de mun muitalan
maid son lea dahkan munnje.
17 Mun čurvon sutnje,
mu njuokčama alde
lei juo máidnunlávlla.
18 Jos mus livččii leamaš
vearrivuohta mielas,
de Hearrá ii livčče gullan mu.
19 Muhto Ipmil guldalii,
son gulai mu rohkadusa jiena.
20 Máidnojuvvon lehkos Ipmil!
Son ii hilgon mu rohkadusa
iige biehttalan mus iežas árpmu.