Sálbma 67
1 Koarrajođiheaddjái. Streaŋgačuojanasaiguin. Sálbma. Lávlla.
2 Ipmil, leage midjiide árbmugas
ja buressivdnit min.
Divtte iežat muođuid čuovgat
midjiide. Sela
3 Dalle du geaidnu šaddá dovddusin
eatnama alde,
ja buot álbmogat gullet
ahte don beasttát.
4 Álbmogat rámidit du, Ipmil,
buot álbmogat rámidit du.
5 Álbmogat illudit ja ávvudit,
go don dubmet daid vuoigatlaččat,
don láidet olbmuid čearddaid
eatnama alde. Sela
6 Álbmogat rámidit du, Ipmil,
buot álbmogat rámidit du.
7 Eanan lea addán šattuidis.
Ipmil, min Ipmil, buressivdnida min.
8 Ipmil buressivdnida min,
ja oppa eanan ballá sus.