Sálbma 7
1 Davida váidalansálbma. Son lávllui dan Hearrái benjaminlaš Kuša ságaid dihte.
2 Hearrá, mu Ipmil,
dutnje mun dorvvastan.
Beastte mu ja gájo mu buohkain
geat doarridit mu,
3 muđui vašálaš gaikkoda mu
dego ledjon
ja geassá mu eret,
iige oktage veaje mu gádjut.
4 Hearrá, mu Ipmil,
jos mun lean sivalaš,
jos mu gieđain lea
vuoigatmeahttunvuohta,
5 jos lean dahkan bahá ustibii
ja speadjan vuostálasti
almmá siva haga,
6 de doarridehkos ja joksos
vašálaš mu,
dulbmos mu heakka eatnamii
ja bálkestehkos mu gudni
muldii. Sela
7 Hearrá, čuožžil moaristat,
vuostálastte daid geat vašuhit mu.
Morit, mu Ipmil,
don guhte gohčut dupmui.
8 Bovde ovdasat álbmogiid,
čohkán truvdnosat allagassii.
9 Hearrá dubme álbmogiid.
Veahket mu oažžut vuoigatvuođa,
dasgo munhan lean vanhurskkis
ja láitemeahttun.
10 Loahpat ipmilmeahttumiid
bahávuođa,
muhto divtte vanhurskása
bissut nanusin,
don oskkáldas Ipmil,
donhan dutkkat váimmu
ja monimuččaid.
11 Ipmil lea mu galba,
son beastá daid
geaid váibmu lea vuoigatlaš.
12 Ipmil lea vanhurskkis duopmár,
Ipmil guhte moaráhuvvá
juohke beaivvi.
13 Jos muhtun ii vuollán,
de son sadjá miehkis,
gealdá dávggis ja sikte.
14 Son ráhkada goddi vearjjuid
ja gárvvista buolli njuolaid.
15 Geahča, ipmilmeahttun guoddá
bahávuođa goaŧus,
sahkanahttá vearrivuođa
ja riegádahttá behttosa.
16 Son lea goivon rokki
ja dahkan dan čieŋalin,
muhto ieš son gahččá dan roggái
maid goaivvui.
17 Vearrivuohta maid son smiehtai,
jorggiha su iežas vuostá,
veahkaváldi deaivá su iežas oaivečohkkii.
18 Mun rámidan
Hearrá vanhurskkisvuođa
ja máinnun Hearrá, Alimusa, nama.