Sálbma 72
1 Salomo sálbma.
Ipmil, oahpat gonagassii lágaidat,
gonagasa bárdnái vuoigatlašvuođa!
2 Dalle son dubme
du álbmoga riekta,
vártnuhemiid vuoiggalaččat.
3 Várit addet olbmuide ráfi
ja dievát šaddadit
vanhurskkisvuođa šattuid.
4 Dalle gonagas várjala
álbmoga vártnuhemiid rivttiid
ja beastá váivvášiid,
muhto cuvke daid geat sordet earáid.
5 Suova su eallit buolvvas bulvii,
nu guhká go beaivváš báitá
ja mánnu guolbmá.
6 Son lea dego arvi mii gahččá
láddjejuvvon gieddái,
nugo oakti mii láktada eatnama.
7 Su beivviid
vanhurskkisvuohta ovdána,
ja ráfi eatnatvuohta ráđđe
dassá go mánnu ii leat šat.
8 Son ráđđe ábis áhpái,
stuorra eanu rájes
gitta eatnama ravddaide.
9 Su vuostálastit
gopmirdit su,
su ovddas vašálaččat njollot muoldda.
10 Taršiša ja gáiddus rittuid
gonagasat buktet vearuid,
Saba ja Seba gonagasat attáldagaid.
11 Buot gonagasat luoitádit
su ovdii,
buot álbmogat bálvalit su.
12 Son gádju váivváša
gii čuorvu su,
vártnuheami
gean ii oktage veahket.
13 Son árpmiha heaju ja geafi
ja beastá váivváša áŧestusas.
14 Son gádju sin givssis
ja veahkaválddis,
sin heagga lea divrras su čalmmiin.
15 Ellos gonagas guhká
ja ožžos Saba golliid.
Vare olbmot álelassii
rohkadalašedje su ovddas
ja buressivdnidivčče su
geažos beaivvi,
16 vai eatnamis šattašii valjis gordni
mii bárustivččii várrečohkaid rádjái,
daid šaddu livččii suohkat
dego Libanona vuovdi
ja bealddu gordnegihput eatnagat
nugo eatnama rássi.
17 Vare su namma bisošii agálaččat,
muitojuvvošii nu guhká
go beaivváš báitá!
Buressivdnidehkoset buohkat
iežaset su nammii,
máidnoset buot álbmogat
su lihkolažžan.
18 Máidnojuvvon lehkos Hearrá,
Israela Ipmil,
dušše son dahká oavdduid.
19 Su hearvás namma
lehkos máidnojuvvon agálaš áigái!
Oppa eatnama dievva lea
su hearvásvuohta.
Amen, amen.
20 Dása nohket Davida, Isaja bártni, rohkosat.