Sálbma 74
1 Asafa oahpahansálbma.
Ipmil, manne leat hilgon min
agibeaivái,
manne du moarri borggista
iežat ealu vuostá?
2 Muitte álbmogat maid
ostet alccesat dolin,
dan čeardda maid lonistit
iežat opmodahkan,
muitte Sionvári,
iežat ássansaji.
3 Mana surgadis
heavvobázahasaid lusa:
Vašálaš lea billistan visot
du bassibáikkis.
4 Du vašálaččat gilljo du viesus,
dohko sii ceggejedje
iežaset mearkkaid.
5 Sii čulle ákšuin
dego suhkkes vuovddis,
6 ákšuin ja veahčiriin
sii cuvkejedje muorravajahagaid.
7 Sii cahkkehedje du bassibáikki,
eahpebasuhedje ja gaikkodedje
du nama ássansaji eatnama ráje.
8 Sii jurddašedje:
Mii duššadit visot.
Sii bolde eatnamis juohke báikki
gos Ipmil lei bálvaluvvon.
9 Mii eat oainne iežamet mearkkaid,
eai leat šat profehtat,
ii oktage mis dieđe
man guhká dát bistteš.
10 Ipmil, man guhká du vuostálastit
ožžot hiddjidit?
Oažžugo vašálaš bilkidit du nama
agibeaivvi?
11 Manne don geasát gieđa ruoktot?
Manne du olgeš giehta
lea čihkosis du ozas?
12 Ipmil, mu gonagas
dološ áiggiid rájes,
don buvttát bestojumi eatnama ala.
13 Don luddejit meara fámuinat,
don cuvkejit guvddiid oivviid.
14 Don časket cuovkkas Leviatana oivviid
ja addet daid biebmun meahcispiriide.
15 Don diktet ádjaga ja joga
golggiidit,
don goikadit čáhccás eanuid.
16 Du lea beaivi, du lea idja,
don bidjet mánu ja beaivváža
sadjáseaset.
17 Don mearridit
buot eatnama rájiid,
geassi ja dálvi leat du duodji.
18 Hearrá, muitte dán
go vašálaš hiddjida,
go jallas álbmot
badjelgeahččá du nama.
19 Ale atte turtelduvvát spiriide,
ale vajáldahte
vártnuhemiidat heakka.
20 Muitte lihttot!
Eatnama sevdnjes báikkit
leat veahkaválddi orrunsajit.
21 Ale suova sordojuvvon olbmuid
beahtahaddat,
divtte gefiid ja vártnuhemiid
máidnut du nama.
22 Čuožžil, Ipmil,
čuoččut iežat ášši!
Muitte mo mielaheamit bilkidit du
geažos beaivvi.
23 Ale vajáldahte
vašálaččaidat čuorvasa,
rieja maid du vuostálastit
álo bajidit.