Sálbma 76
1 Koarrajođiheaddjái. Streaŋgačuojanasaiguin. Asafa sálbma. Lávlla.
2 Ipmil dovdojuvvo Judas,
su namma lea stuoris Israelis.
3 Salemis lea su goahti,
Sionis su ássansadji.
4 Doppe son dojii
álddagasti njuolaid,
galbba, miehki ja
buot soahtevearjjuid. Sela
5 Suonjardeaddji lea du šearratvuohta,
don leat hearváseabbo go agálaš várit.
6 Jálus olbmát rieviduvvojedje,
sáŋgárat oađđájedje,
soahteolbmáid gieđat vuoimmehuvve.
7 Go don áitet, Jakoba Ipmil,
de gálnnai heasta ja riidejeaddji.
8 Hearrá, don leat hirbmatlaš.
Gii máhttá bissut,
go don moaráhuvat?
9 Almmis don gulahat duomu.
Eanan suorgana ja jaskkoda,
10 go Ipmil čuožžila dubmet.
Son beastá buot eatnama váivvášiid.
Sela
11 Don hávkadat olbmuid vaši,
jáddadat moari mii lea báhcán.
12 Addet lohpádusaid Hearrái,
Ipmilasadet,
diktet su oažžut dan maid lehpet lohpidan!
Buktoset buot ránnjáálbmogat
attáldagaid sutnje geas ballet.
13 Son doadjá ráđđejeddjiid vuoiŋŋa,
eatnama gonagasat fertejit ballat sus.