Sálbma 77
1 Koarrajođiheaddjái. “Jedutuna” láhkái. Asafa sálbma.
2 Mun rohkadalan Ipmila,
čuorvvun alla jienain,
mun rohkadalan Ipmila, ja son gullá mu.
3 Áŧestusastan mun ozan Hearrá,
ihkku mun geaigguhan gieđa
inge heaitte.
Mu siellu ii leat jeđđemis.
4 Mun muittán Ipmila ja šuohkán,
mun jurddašattan,
ja mu vuoigŋa vuoimmehuvvá. Sela
5 Don doalat mu čalmmiid rabas,
mun lean mášoheapme ja jávoheapme.
6 Mun jurddašan dološ áiggiid,
muittašan vássán jagiid.
7 Ihkku mun soađan jurdagiiguin,
mun jorahan daid
ja geahččalan ipmirdit.
8 Hilgugo Hearrá min agibeaivái,
iigo son goassege šat árpmit?
9 Leago su oskkáldasvuohta nohkan
agálaš áigái,
aingo son lea jávohaga,
buolvvas bulvii?
10 Leago Ipmil vajáldahttán iežas árpmu,
leago son moaristis
dahppan váimmus? Sela
11 Mun jurddašan: “Dat lea mu giksi:
Alimusa olgeš giehta lea rievdan.”
12 Mun muittašan du daguid, Hearrá,
mun muittán oavdduid
maid dahket dolin.
13 Mun jurddašan buot
maid don leat dahkan,
suokkardan du stuorra daguid.
14 Ipmil, du geainnut leat basit,
du veardásaš ii leat gostege.
15 Don leat Ipmil,
don dagat oavdduid,
don leat čájehan iežat fámu
álbmogiidda.
16 Fámolaš gieđain don lonistit iežat álbmoga,
Jakoba ja Josefa mánáid. Sela
17 Čázit oidne du, Ipmil,
čázit oidne du ja libaidedje,
velá meara čiekŋalasatge
doarggistedje balus.
18 Balvvat golggahedje čázi,
badjin čearggui baján,
du njuolat šleđgo ovddas maŋás.
19 Du bajána vovdnajorrit japme,
álddagasat čuvgejedje eatnama,
eanan doarggistii ja sparaidii.
20 Du geaidnu manai meara čađa,
du bálggis stuorra čáziid rastá,
muhto du luottat eai vuhtton.
21 Don láidejit iežat álbmoga
dego báimman ealus,
dan geahččit leigga Moses ja Aron.