Sálbma 80
1 Koarrajođiheaddjái. Lávlojuvvo dego “Lilját”. Duođaštus. Asafa sálbma.
2 Gula min, Israela báimman,
don guhte doalvvut Josefa dego ealu,
don gean truvnnu kerubat guddet.
Almmustuva hearvásvuođastat
3 Efraima, Benjamina
ja Manasse čearddaide!
Čájet iežat fámu ja boađe veahkehit min!
4 Čuoččáldahte min fas, Ipmil,
divtte min oaidnit du muođuid čuovgga,
nu ahte mii bestojuvvot!
5 Hearrá, Almmiveagaid Ipmil,
man guhká du moarri borggista,
itge don guldal álbmogat rohkadusaid?
6 Don leat borahan midjiide ganjalláibbi,
jugahan gatnjaliid badjelmearálaččat.
7 Don leat bidjan min riidaleamošin
ránnjáidasamet,
min vašálaččat hiddjidit min.
8 Čuoččáldahte fas min,
Almmiveagaid Ipmil,
divtte min oaidnit du muođuid čuovgga,
nu ahte mii bestojuvvot!
9 Don váldet viidnemuora Egyptas,
ádjet álbmogiid eret ja ceggejit dan.
10 Dan murrii don njásket saji,
ja dat ruohtastuvai ja devddii eatnama.
11 Dat suoivvanasttii váriid,
dan oavssit gokče stuorra sederiid.
12 Dat lebbii ovssiidis meara rádjái,
surggiidis gitta Eanu rádjái.
13 Manne don gaikkodit áiddi dan birra,
nu ahte buohkat geat vázzet meattá,
sáhttet čoaggit dan šattuid?
14 Vuovddi meahccespiidni jursá dan,
meahci smávva eallit borret dan.
15 Máhca min lusa,
Almmiveagaid Ipmil,
geahča vuolás almmis ja oainne!
Bealuš dán viidnemuora,
16 dan vesá maid leat ceggen
olgeš gieđainat,
dan bártni geasa don ieš leat addán fámu.
17 Vare du muođuid ovddas
duššašedje dat geat leat dan njeaidán
ja boaldán!
18 Vare du giehta várjalivččii su
gii lea du olgeš gieđa bealde,
dan olbmá geasa don leat addán fámu.
19 Mii eat gáidda dus.
Suova min eallit,
de mii čuorvut du nama.
20 Čuoččáldahte fas min, Hearrá,
Almmiveagaid Ipmil,
divtte min oaidnit du muođuid čuovgga,
de mii bestojuvvot!