Sálbma 83
1 Lávlla, Asafa sálbma.
2 Ipmil, ale šat oro jávohaga!
Ale leage jaska, Ipmil,
ale leage jietnatkeahttá!
3 Du vašálaččat šlápmet,
dat geat vašuhit du, bajidit oaivvi.
4 Sii hutket bahás juonaid
du álbmoga vuostá,
sii ráđđádallet daid vuostá
geaid don suodjalat.
5 Sii dadjet: “Bohtet, jávkadehkot
oppa álbmoga,
vai ii oktage šat muittáše Israela nama!”
6 Sii leat oktii ráđiid
dahkan lihtu du vuostá –
7 Edoma olbmot ja ismaellaččat,
Moab ja hagarlaččat,
8 Gebal, Ammon ja Amalek,
Filistea ja Tyrosa ássit,
9 velá Assurge lea searvan singuin
ja veahkeha Lota bártniid. Sela
10 Daga sidjiide nugo Midjanii,
nugo dahket Siserai ja Jabinii
Kišonjogašgáttis.
11 Soai heavahuvvuiga En-Dora guoras,
soai šattaiga eatnama duktan.
12 Vare sin bajimuččaide geavašii
nugo Orebii ja Seebii,
buot sin oaivámuččaide
dego Sebahii ja Salmunnai!
13 Siihan dadjet:
“Mii váldit Ipmila ássansajiid.”
14 Mu Ipmil, daga sin rihpaborgan,
sáđđun mat girdet biekkas!
15 Nugo dolla boaldá vuovddi
ja dollanjuokčamat buolláhit váriid,
16 nu áje sin garra dálkkiinat,
suorggat sin riđuinat!
17 Divtte sin muođuid ruvssodit
heahpadis,
dassá go sii ohcet du, Hearrá.
18 Vare sin oassi livččii
agálaš ballu ja bilku,
vare sin loahppa livččii heahpatlaš.
19 Divtte sin ipmirdit ahte don okto,
don gean namma lea Hearrá,
leat Alimus,
fámolaš oppa eatnamis!