Sálbma 92
1 Sálbma, sabbatlávlla.
2 Buorre lea rámidit Hearrá,
lávlut máidnuma du nammii, Alimus.
3 Buorre lea gulahit
du buorrevuođa iđedis,
juohke ija du oskkáldasvuođa
4 lyra šuoŋaiguin,
logisuonat hárppa čuojahemiin.
5 Hearrá, don illudahtát mu daguidatguin,
mun rámidan du gieđaid daguid.
6 Man stuorrát leat du dagut, Hearrá,
man čiekŋalat du jurdagat!
7 Jierpmehis olmmái ii dan ipmir,
jalla ii dan ádde.
8 Vaikko ipmilmeahttumat
šaddet dego rásit
ja buot vearredahkkit liđiidit,
de sii almmatge duššet, jávket agálaččat.
9 Don, Hearrá, leat alimus agálaš áigái.
10 Muhto du vašálaččat duššet, Hearrá,
buot vearredahkkit bieđganit.
11 Muhto mu givrodat badjána
dego meahcivuovssá čoarvi,
don vuoiddat mu varas oljjuin.
12 Mun beasan oaidnit
mo mu vašálaččat gahččet,
gullat mo bahás falleheaddjit duššet.
13 Vanhurskásat bohciidit nugo pálmmat,
sii šaddet allagin
dego Libanona sederat.
14 Sii leat gilvojuvvon Hearrá vissui,
sii liđiidit min Ipmila ovdašiljuin.
15 Velá boarisinge sii šaddadit šaddosiid,
leat šaddilat ja ruotnasat
16 ja muitalit Hearrá vuoigatlašvuođa.
Hearrá lea mu bákti,
sus ii leat mihkkege vearrivuođaid.