VUOSTTAŠ GIRJI
Sálbma 1
11 Ávdugas lea son guhte ii vádjol
ipmilmeahttumiid ráđi mielde,
guhte ii čuovvul suttolaččaid geainnu
iige čohkká bilkideddjiid čohkkánsajis,
2 muhto gávdná ilu Hearrá lágas
ja guorahallá dan ijatbeaivái.
3 Son lea dego muorra
mii lea gilvojuvvon čáhcejogažiid gáddái:
dat addá šaddosa rivttes áigái,
eaige dan lasttat golnna.
Buot maid son dahká, lihkostuvvá.
4 Nu eai ipmilmeahttumat –
sii leat dego sáđut maid biegga biđge.
5 Dan dihte ipmilmeahttumat
eai ceavzze go duopmu celkojuvvo,
iige suttolaččain leat sadji
vuoigatlaččaid searvvis.
6 Hearrá dovdá vuoigatlaččaid geainnu,
muhto ipmilmeahttumiid geaidnu
doalvu hevvui.