Čieža eŋgela ja čieža givssi
1 Mun oidnen almmis nuppi eará mearkka, stuorrá ja ovddolačča: Čieža eŋgela geain ledje čieža givssi. Dát givssit leat maŋimuččat, danin go dain Ipmila moarri ollašuvvá.
2 Mun oidnen dego láseábi mii šealggui dollan. Láseáhpegáttis mun oidnen čuožžumin daid geat ledje vuoitán beađu, daid geat eai lean rohkadallan dan gova eaige váldán dan mearkka mas lei dan nama lohku. Sis ledje gieđas Ipmila hárppat, 3 ja sii lávlo Mosesa, Ipmila bálvaleaddji, ja Lábbá lávlaga:
Stuorrát ja ovddolaččat leat du dagut,
Hearrá Ipmil, Buotveagalaš!
Vuoigatlaččat ja duođat leat du geainnut,
don álbmogiid gonagas!
4 Gii ii balaše dus, Hearrá,
gii ii gudnejahtáše du nama?
Don okto leat bassi.
Buot álbmogat bohtet du ovdii
ja rohkadallet du,
danne go du vuoigatlaš duomut
leat boahtán albmosii.
5 Das maŋŋil mun oidnen go almmi tempel, duođaštusa goahti, rabastuvvui, 6 ja tempelis bohte čieža eŋgela geaid hálddus ledje čieža givssi. Sii ledje gárvodan buhtis vilges beallemasbiktasiid, ja ratti birra sis lei golleboagán. 7 Okta dan njealji sivdnádusas attii dan čieža eŋgelii čieža gollegeara maid dievva lei Ipmila moarri, su gii eallá álo ja agálaččat. 8 Ipmila hearvásvuohta ja fápmu devddii tempela suovain, iige oktage sáhttán mannat sisa tempelii, ovdal go dan čieža eŋgela čieža givssi ledje nohkan.