Almmálaš ipmilbálvalus
1 Dasto mun oidnen dán: Almmi uksa lei rabas, ja gullui seammá jietna maid mun ledjen gullan ovddit háve – dego livččii bossojuvvon dorvii. Dat celkkii munnje: “Boađe deike bajás! Mun čájehan dutnje mii dás maŋŋil šaddá.”
2 Dan seammás mun rohttašuvven Vuoiŋŋas. Mun oidnen ahte almmis lei truvdnu ja truvnnus lei čohkkámin muhtun 3 gii lei oaidnit dego jaspis ja karneola. Truvnnu birra lei arvedávgi mii lei smarágda láhkásaš. 4 Dan truvnnu birra mun oidnen guokteloginjeallje truvnnu, ja dain čohkkájedje guokteloginjeallje vuorrasa geaidda ledje gárvvuhuvvon vilges biktasat ja geaid oaivvis lei gollekruvdnu. 5 Truvnnus bohte álddagasat ja dego bajána jumat. Dan ovddas ledje čieža spáidara, Ipmila čieža vuoiŋŋa, 6 ja dan ovddas lei dego láseáhpi, kristálla láhkásaš.
Aiddo truvnnu ovddas ja birra ledje njeallje sivdnádusa maid ovdabeales ja maŋábeales ledje dievva čalmmit. 7 Vuosttaš sivdnádus lei ledjona láhkásaš, nubbi nuorra vuovssá láhkásaš, goalmmádis lei olbmo ámadadju ja njealját lei girdi goaskima láhkásaš. 8 Dan njealji sivdnádusas ledje guđesge guhtta soajá maid goappašiid beliid dievva ledje čalmmit. Sivdnádusat čurvo heaittekeahttá, ijatbeaivái:
Bassi, bassi, bassi lea Hearrá Ipmil,
Buotveagalaš!
Son lei, son lea ja son boahtá.
9 Ja álo go sivdnádusat máidnot, gudnejahttet ja giitet su gii čohkká truvnnus ja eallá álo ja agálaččat, 10 de dat guokteloginjeallje vuorrasa luoitádit su truvnnu ovdii, giitet ja gudnejahttet su gii eallá álo ja agálaččat, bidjet kruvnnuideaset truvnnu ovdii ja celket:
11 Hearrá, min Ipmil!
Don leat dohkálaš
oažžut máidnuma, gudni ja fámu,
danne go don leat sivdnidan buot.
Buot mii lea,
lea du dáhtus sivdniduvvon.