Nahami jïh Rudte
1 Dej beeli gosse duapmerh Jisraelem stuvrin, dellie ikth gaajhkh almetjh laantesne nealkoeminie. Dellie ålma Bet-lehemeste Judeste jïjtse gåmmine jïh jïjtse göökte baerniejgujmie Moabese juhtieji desnie boelhkem årrodh. 2 Ålman nomme Elimelek, jïh gåmman nomme Nahami jïh baerniej nommh Mahlon jïh Kiljon. Dah lin Efraten boelveste, Bet-lehemeste Judeste. Dellie dah Moabese böötin jïh dïsse orrijin.
3 Dellie Elimelek, Nahamin geelle, sealadi jïh aarpije Nahami oktegh baerniejgujmie sjïdti. 4 Baernieh Moaben nyjsenæjjajgujmie pruvrigan; mubpien nomme Orpa jïh mubpien nomme Rudte. Gosse desnie mahte luhkie jaepieh orreme, 5 dellie aaj Mahlon jïh Kiljon sealadigan guktie Nahami oktegh sjïdti, baernehth jïh geellehth.
6 Dellie Nahami Moabeste mænnjajgujmie bååstide gåetide juhtieji juktie åådtjeme govledh Åejvie altese almetjidie debpene gorredamme jïh dejtie laejpiem vadteme. 7 Nahami årrome-sijjiem leehpi jïh jïjtse mænnjah dåeriedigan.
Gosse Judese juhtieminie, 8 Nahami jïjtse mænnjide jeehti: «Jarkeden daelie bååstide dotnen tjidtjiej gåajkoe. Vaajt Åejvie buerievoetem dotnese vuesehte seammalaakan guktie dåtnoeh buerievoetem munnjien jïh dejtie vuesiehtamme gïeh sealadamme. 9 Vaajt Åejvie jearsoesvoetem jïh orre hïejmh jïh geellh dotnese vadta.» Dan mænngan dejtie tjuvliesti jïh gåvnahti. Dah jis tjyörijigan 10 jïh jeehtigan: «Ijje, månnoeh sijhtien datnem dåeriedidh dov almetji gåajkoe!» 11 Nahami dellie vaestiedi: «Jarkeden bååstide, mov dakterh! Mannasinie edtjeden mannem dåeriedidh? Im vielie maehtieh baernieh baersieldidh gïeh dotnese maahteme geelline sjïdtedh. 12 Jarkeden bååstide! Manne dan båeries ikth vielie pruvredh. Maaje jeehkim håhkoe lij, joe daan jïjjen nåajsan sjïdtim jïh dellie baernieh baersieldim. 13 Edtjiden dellie dejtie vuertedh gossege dah geerve sjïdtigan? Liden dej dïehre gåetesne geellehth tjahkasjamme? Ijje, mov dakterh! Daate haerhpebe munnjien goh dotnese juktie Åejvien gïete mannem tsaapmeme.» 14 Dellie vihth tjyörijægan, jïh Orpa vuanovem gåvnahtahkine tjuvleste. Mohte Rudte ij maehtieh vuanavistie juakanidh. 15 Nahami jeahta: «Gïehtjh! Dov gaaloejööne bååstide jïjtse almetji gåajkoe jïh jïjtse Jupmielasse jarkoe. Dåeredh dam bååstide.» 16 Rudte dellie vaestede: «Aellieh mannem eevtjh datnem laehpedh jïh bååstide jarkedh juktie:
Dahkoe gåabpoeh datne vaadtsah, manne aaj vaadtsam,jïh gusnie datne årroeh, manne sïjhtem årrodh.Dov almetjh mov almetjhjïh dov Jupmele mov Jupmele.17 Dan sæjjan datne sealedh,dïsse sïjhtem sealadidh jïh dïsse juvlelgidh.Vaajt Åejvie baaja mannem smualkedhdaelie jïh mænnganjis mij jeatjah goh jaememe, monnem juaka.»18 Gosse Nahami guarkaji Rudte eepts-mierien sïjti satnem dåeriedidh, dellie idtji vielie dan bïjre soptsesth.
19 Dellie Bet-lehemese veedtsigan.