1 Salomo allalávlla.
Moarsi
2 Cummástallos son mu
njálmmis cummáiguin!
Du ráhkisvuohta lea buoret go viidni,
3 du vuoidasiid hádja lea hávskái!
Du namma lea dego
fiidnámus vuoidanolju,
danne nieiddat ráhkistit du.
4 Váldde mu gihtii, viehkku!
Doalvvo mu gámmárasat, gonagas!
Mii ávvudit, mii illudit du dihte,
mii rámidit du ráhkisvuođa
eambbo go viinni.
Rievttuid sii ráhkistit du.
5 Mun lean čáhppat, almmatge liekkus,
dii Jerusalema nieiddat,
dego Kedara goađit,
nugo Salomo goahteloavdagat.
6 Allet geahča munnje
danne go lean čáhppat,
go beaivváš lea goardán mu.
Eadnán bártnit moaráhuvve munnje,
sii bidje mu gáhttet viidnegárddiid.
Iežan viidnegárddi mun in gáhtten.
7 Muital munnje, ráhkkásan,
gos don guođohat ealu,
gos livvadahtát dan gaskabeaivvi,
aman čádjidit du ustibiid ealu lusa.
Irgi8 Jos don it dan dieđe,
don nissoniin čábbámus,
de guora sávzaealu luottaid
ja doalvvo gihciidat guohtut
guođoheddjiid gođiid gurrii.
9 Ráhkkásan, dego dámmá
farao vovnna ovddas
don leat mu čalmmiin.
10 Čábbát leat du nierat
beallječiŋaid gaskkas,
čáppat du čeabet bearalbáttiidisguin!
11 Mii duddjot dutnje golleviđjjiid
ja viđjjiide silbaboaluid.
Moarsi12 Go gonagas mieigá beavddis,
de mu nardusvuoiddas addá hája.
13 Mu ráhkis lea dego myrragiesaldat
čiččiidan gaskkas.
14 Mu ráhkis lea hennalieđđegihppu,
En-Gedi viidnegárddiin boibmojuvvon.
Irgi15 Don leat čáppat, mu iežan ráhkis,
don leat čáppat! Du čalmmit leat duvvát.
Moarsi16 Don leat čáppat, mu iežan ustit,
don leat čáppat!
Munno oađđinsadji lea ruonas.
17 Munno viesu bielkkát leat sedermuoras,
sypressat munno dáhkki.