1 Oappážan, moarsážan!
Mun boađán gilvvagárdásan
ja čoakkán iežan myrra ja balsama.
Mun boran iežan honnega
ja honnetgáhku,
jugan iežan viinni ja mielkki.
EarátBorri, ustibat!
Gárihuvvi ráhkisvuođas!
Moarsi2 Mun ođđen, muhto mu váibmu gozii.
Gullet, mu ráhkis goalkkuha!
“Oappážan, buorážan,
mu duvvá, iežan fávru, rabas munnje!
Suoldni lea láktadan mu vuovttaid,
ija goaikkanasat leat njuoskadan
mu smarvviid.”
3 Mun lean nuollan biktasa,
galggašingo mun fas gárvodit?
Mun lean bassan julggiid,
galggašingo mun fas daid duolvadit?
4 Mu ráhkis geige gieđa láseráiggi,
mu siskkildas lihkahuvvui.
5 Mun čuožžilin rahpat ráhkkásasan,
ja myrra goaiku mu gieđain.
Mu suorpmain golgá myrra uksagevjii.
6 Mun rahpen ráhkkásasan,
muhto son lei mannan.
Mun heađástuvven – son lei jávkan!
Mun ohcen su, muhto in gávdnan,
mun čurvon, muhto ii son vástidan.
7 Gávpoga goziheaddjit bohte mu ovddal.
Sii cábme mu, hávvádahtte mu
ja válde mus oalgeliinni,
gávpoga goziheaddjit!
8 Jerusalema nieiddat,
mun vuortnuhan din:
Jos dii gávdnabehtet mu ráhkkása,
de muitalehket sutnje
ahte mun lean buohccin ráhkisvuođas!
Earát9 Mo du ráhkis lea earáid buoret,
don nissoniin čábbámus?
Mo du ráhkis lea earáid buoret,
go don nie vuortnuhat min?
Moarsi10 Mu ráhkis lea ođđavarat
ja ruksesnierat,
earenoamáš logiduháha gaskkas.
11 Su oaivi lea fiidnámus golli láhkásaš,
su smarvvit dego daddelgihput,
čáhppadat nugo gáranas.
12 Su čalmmit leat dego guokte duvvá
golgi ádjagiid guoras,
nugo duvvát mat leat lávggodan mielkkis
ja čohkkájit valljugasvuođa ravddas.
13 Su nierat leat dego
njálggahájat urttasbeaŋkkat
main máisttaurtasat šaddet.
Su baksamat leat lilját,
dain goaiku golgi myrra.
14 Su gieđat leat krysolihtaiguin
čiŋahuvvon gollesoappit,
su čoavji dego elefántabátnegalba
man hearvan leat safirat.
15 Su juolggit leat alabasterbáccit,
gollevuođđudusa ala ceggejuvvon.
Son lea oaidnit dego Libanon,
hearvái nugo sedermuorra.
16 Su njálbmi njálggiida,
son lea čielga liekkusvuohta.
Dákkár lea mu ráhkis,
dákkár lea mu ustit, Jerusalema nieiddat!