Allalávlla

¹ Vare don livččet mu viellja,

gean mu eadni lea njamahan!

Dalle mun cummistivččen du

go deaivvadetne olgun,

iige oktage badjelgeahčaše mu dan dihte.

² Mun válddášin du eadnán vissui,

su lusa gii riegádahtii mu.

Mun njorrešin dutnje máisttaviinni

ja granáhtaehpeliiddán sáhpi.

³ Su gurut giehta lea mu oaivvi vuolde,

su olgeš giehta fátmmasta mu.

⁴ Mun vuortnuhan din,

Jerusalema nieiddat:

Allet bovtte ráhkisvuođa,

allet muosehuhte dan ovdal go

dat ieš hálida!

⁵ Gii lea duot gii boahtá meahcis

ja mieigá iežas ráhkkásii?

Mun bokten du ehpelmuora vuolde,

doppe gos du eadni sahkanahtii du,

gos du riegádahtti sahkanahtii du.

⁶ Bija mu seailan váibmot vuostá,

bija seailan iežat giehtaruohttasa birra.

Ráhkisvuohta lea gievra nugo jápmin,

hálidus sodjameahttun

dego jábmiidáibmu.

Dat buollá dego dolla,

nugo fámolaš dollanjuokčamat.

⁷ Stuorra čázit eai sáhte

čáskadit ráhkisvuođa,

eanut eai veaje dan heavahit.

Jos muhtun attášii buot maid eaiggáduššá

vai vuoitá ráhkisvuođa,

de gii badjelgeahčašii su?

⁸ Mis lea uhca oappáš

geas eai leat velá čiččit.

Maid mii dahkat oabbáseamet

dan beaivvi go irggit bohtet?

⁹ Jos son livččii muvra,

de mii nannešeimmet dan silbahárjjiin.

Jos son livččii uksa, de mii dahpašeimmet

dan sederfielluin.

¹⁰ Mun lean muvra,

ja mu čiččit leat dego toartnat.

Muhto go son boahtá, de mun vuollánan.

¹¹ Salomos lei viidnegárdi

Baal Hamonis.

Son attii dan gáhttejeaddji háldui

gii galggai máksit šattus

duhát šekela silba.

¹² Muhto mu viidnegárdi lea dás.

Doala duháhiiddát, Salomo,

ja atte vel guoktečuođi gáhttejeaddjái!

¹³ Don gii orut gilvvagárddis,

ustibat dáhttot gullat du jiena,

divtte mu gullat du dadjamin:

¹⁴ “Doama, mu ráhkis,

dego gasella dahje nuorra sarvva

njálggahájat váriide!”