Sakarja

Viđát oainnáhus: Lámpájuolgi ja oliivamuorat

¹ Dat eŋgel guhte sártnui muinna, bođii fas ja bovttii mu, dego muhtin boktá olbmá nahkáriin. ² Son jearai mus: “Maid don oainnát?” Mun vástidin: “Mun oainnán lámpájuolggi mii lea sieiva golli, ja lihti dan geažis. Das leat maiddái čieža lámppá, ja juohke lámppás čieža bohcci. ³ Dan bálddas leat guokte oliivamuora, nubbi olgeš bealde lihti ja nubbigis gurut bealde.”

⁴ Mun jerren eŋgelis gii lei sárdnumin muinna: “Mat dát leat, hearrá?” ⁵ Eŋgel guhte lei sárdnumin muinna, dajai: “Itgo don dieđe mat dát leat?” Mun vástidin: “In dieđe, hearrá.” ⁶ De son celkkii munnje: Dát lea Hearrá sátni Serubbabelii:

Ii fámuin iige vuimmiin,

muhto mu Vuoiŋŋain,

cealká Hearrá, Almmiveagaid Ipmil.

⁷ Gii don leat, don veagalaš várri? Don it leat go duolba eanan Serubbabela ovddas. Son buktá čohkkageađggi dan botta go sii čurvot: “Lihkku ja buressivdnádus!” ⁸ Hearrá sátni bođii munnje: ⁹ Serubbabela gieđat leat bidjan dán viesu vuođu, su gieđat maiddái ollašuhttet dan. Dalle dii diehtibehtet ahte Hearrá, Almmiveagaid Ipmil, lea vuolggahan mu din lusa. ¹⁰ Dat geat badjelgehčče álgguheadjuvuođa beaivvi, illudit go oidnet válljejuvvon geađggi Serubbabela gieđas. Dat čieža leat Hearrá čalmmit mat johtet miehtá eatnama. ¹¹ Mun jerren sus: “Mat leat dat guokte oliivamuora lámpájuolggi olgeš ja gurut bealde?” ¹² Mun jerren sus vel: “Mat leat dat guokte oliivaoavssi main golgá golleivnnat olju dan guovtti gollebohcceráigge?” ¹³ Son jearai: “Itgo don dieđe mat dat leat?” Mun vástidin: “In dieđe, hearrá.” ¹⁴ De son celkkii: “Dat leat dat guovttis geat leaba vuidojuvvon oljjuin. Soai čuožžuba oppa eatnama hearrá ovddas.”