Gi hjerteStøtt nettbibelen
Gå til forsiden

Sakarja

7

Vuoigatlašvuohta buoret go fástu

1 Gonagas Dareiosa njealját ráđđenjagi ovccát mánus dahjege kislevmánus, mánu njealját beaivvi, bođii Hearrá sátni Sakarjai. 2 Betelis lei vuolggahuvvon Sareser ja Regem-Melek ja soames earát olbmát átnut Hearrás árpmu. 3 Sii galge jearrat báhpain geat bálvaledje Hearrá, Almmiveagaid Ipmila, tempelis, ja profehtain: “Galgágo Betelis ain čierrut ja fástudit viđát mánus, nugo lea dahkkojuvvon ollu jagiid?” 4 De munnje bođii dát Hearrá, Almmiveagaid Ipmila, sátni:

5 Jeara eatnama álbmogis ja báhpain: Go dii lehpet fástudan viđát ja čihččet mánus čiežalogi jagi, de lehpet go mu dihte dalle fástudan? 6 Go dii borrabehtet ja juhkabehtet, ehpetgo dii daga dan iežadet dihte? 7 Ehpetgo dii muitte daid sániid maid Hearrá lei gohččon ovddit profehtaid cealkit, dalle go Jerusalemis ja dan birasgávpogiin olbmot ain ásse oadjebassan, ja Negevis ja Šefelas ledje ássit?

8 Hearrá sátni bođii Sakarjai:

9 Ná cealká Hearrá, Almmiveagaid Ipmil: “Dubmejehket riekta, lehket buorit ja váibmoláđđásat guhtet guoibmáseattet! 10 Allet vealat leaskkaid alletge oarbásiid, amas olbmuid ja gefiid. Allet hutkka baháid guhtet guimmiideattet vuostá.” 11 Ná mun sárdnon din áhčiide, muhto sii biehttaledje guldaleames. Sii ledje vuostehágolaččat, jorgaledje munnje selggiid eaige dahkan oppa gullinge. 12 Sii garradedje váimmuset garasin dego diamánta, ja nu sii eai gullan dan lága eaige daid sániid maid Hearrá, Almmiveagaid Ipmila, vuoigŋa lei gohččon dološ profehtaid sárdnut. Dalle Hearrá, Almmiveagaid Ipmil, moaráhuvai sidjiide sakka. 13 Sii eai dáhtton gullat go son čuorvvui, ja danne Hearrá, Almmiveagaid Ipmil, celkkii: “In munge dáhto gullat go sii čurvot. 14 Mun bosádan sin dakkár álbmogiid gaskii maid sii eai dovdda.” Eanan bázii ávdimin sin maŋŋil, iige oktage johtán doppe. Nu sii dahke iežas hearvás eatnama ávdin meahccin.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.