1 Munnje bođii dát Hearrá, Almmiveagaid Ipmila, sátni:
2 Ná cealká Hearrá, Almmiveagaid Ipmil:
Mus lea buolli áŋgirvuohta Siona dihte,
mun áŋgirušan stuorra moriin
Siona ovddas.
3 Ná cealká Hearrá:
Mun máhcan Sionii,
mun dáhtun ássat Jerusalemis.
Jerusalem gohčoduvvo
Oskkáldas gávpogin,
ja Hearrá, Almmiveagaid Ipmila, várri
gohčoduvvo Bassi várrin.
4 Ná cealká Hearrá, Almmiveagaid Ipmil:
Velá čohkkájit Jerusalema šiljuin
vuoras olbmát ja nissonat,
buohkat soabbi gieđas boarisvuođa geažil,
5 ja Jerusalema gáhtain ja šiljuin
leat dievva duhkoraddi bártnážat
ja nieiddažat.
6 Ná cealká Hearrá, Almmiveagaid Ipmil:
Jos dát orru leamen
veadjemeahttun daid mielas
geat vel leat álbmogis báhcán,
leago dat dan dihte
veadjemeahttun munnje?
jearrá Hearrá, Almmiveagaid Ipmil.
7 Ná cealká Hearrá, Almmiveagaid Ipmil:
Mun beasttán iežan álbmoga
nuortti eatnamiin ja oarjji eatnamiin,
8 mun buvttán sin ássat Jerusalemii.
Sii leat mu álbmot, ja mun lean sin Ipmil,
oskkáldas ja vanhurskkis.
9 Ná cealká Hearrá, Almmiveagaid Ipmil: Lehket roahkkadat, go dii dál gullabehtet profehtaid gulaheamen dáid mu sániid. Sii gulahedje daid juo dalle go Hearrá, Almmiveagaid Ipmila, tempela vuođđu biddjojuvvui. 10 Ovdal daid áiggiid olbmot eai fidnen bálkká barggusteaset, ja šibihiid rahčamuš manai duššás. Vašálaš ii diktán geange leat ráfis, ja mun suvven buohkaid fallehit guhtet guoimmiset. 11 Muhto daiguin geat vel leat álbmogis báhcán, mun in šat meannut nugo ovdal, cealká Hearrá, Almmiveagaid Ipmil. 12 Gordni šaddá bures, viidnemuorra šaddada šaddosiiddis, eanan addá šattus ja albmi arvvis. Buot dán mun attán daidda geat vel leat dán álbmogis báhcán. 13 Nugo dii lehpet leamaš garuhussan álbmogiid gaskkas, dii Juda ja Israela čearddat, nu dii šaddabehtet buressivdnádussan, go mun beasttán din. Allet bala, lehket roahkkadat! 14 Ná cealká Hearrá, Almmiveagaid Ipmil: Nugo mun mearridin lihkuhisvuođa din badjelii dalle go din áhčit moaráhuhtte mu, inge mun dan gáhtan, cealká Hearrá, Almmiveagaid Ipmil, 15 nu mun lean dál mearridan dahkat buori Jerusalemii ja Juda čerdii. Allet bala!
16 Dáid dii galgabehtet dahkat: Sárdnot duođa guhtet guoibmáseattet. Celket rievttes ja vuoigatlaš duomuid gávpotpoarttas. 17 Allet hutkka baháid guhtet guimmiideattet vuostá. Váruhehket dahkamis vearreváli. Mun vašuhan buot vearrivuođa, cealká Hearrá.
18 Munnje bođii dát Hearrá, Almmiveagaid Ipmila, sátni:
19 Ná cealká Hearrá, Almmiveagaid Ipmil: Njealját ja viđát ja čihččet ja logát mánu fástobeaivvit šaddet Judai illun ja ávvun, hearvás bassebeaivin. Ráhkistehket duohtavuođa ja ráfi!
20 Ná cealká Hearrá, Almmiveagaid Ipmil: Oktii vel dáhpáhuvvá ahte eatnat álbmogat ja ollu gávpogiid olbmot bohtet. 21 Sii mannet gávpogis nubbái ja dadjet: “Bohtet, vulgot átnut Hearrás árpmu, ohcot Hearrá, Almmiveagaid Ipmila! Mun maiddái vuolggán.” 22 Eatnat olbmot ja fámolaš álbmogat bohtet Jerusalemii átnut árpmu Hearrás, Almmiveagaid Ipmilis. 23 Ná cealká Hearrá, Almmiveagaid Ipmil: Daid beivviid logi olbmá geat bohtet sierra álbmogiin ja hupmet sierra gielaid, dohppejit ovtta juvddálaš olbmá bivttashealbmái ja dadjet: “Mii dáhttut vuolgit din fárrui. Mii leat gullan ahte Ipmil lea dinguin.”